Kwatiswa lokungasilo liciniso

Imininingwane Yesimiso
Indlela labaphatseka ngayo labasebentisa loluhlelo

Imininingwane yesimiso

LUSHINTJO KULOKWENTIWE
Inhloso Yesimiso
Kwatiswa lokungasilo liciniso kwehlukile kuletinye tinhlobo tenkhulumo letiseTimisweni tetfu Tawonkhewonkhe ngoba kute indlela yekuchaza luhla lolubanti lwaloko lokungakavunyelwa. Nasi sibonelo, endzabeni yemifanekiso leneludlame noma kutiphatsa lokuveta inzondo, timiso tetfu ticacisa kwatiswa lesikuvimbelako, futsi ngisho nebantfu labangavumelani naleto timiso bangatilandzela. Kodvwa endzabeni yekwatiswa lokungasilo liciniso, asikhoni kukuveta loko. Umhlaba uhlale ushintja, futsi lokuliciniso kulomzuzu lona kungase kungabi liciniso emzuzwini lolandzelako. Kantsi futsi bantfu banemazinga lehlukene emininingwane mayelana nemhlaba labahlala kuwo, futsi bangase bakholelwe kutsi lokutsite kuliciniso kube kungasilo. Umtsetfo lovimbela "kwatiswa lokungasilo liciniso" ngeke unikete satiso lesilusito kubantfu labasebentisa tinhlelo tetfu futsi kungaba matima kuwutsatsela sinyatselo njengobe singakhoni kungena kuyo yonkhe imininingwane.
Esikhundleni saloko, imitsetfo yetfu ichaza tigaba letehlukene tekwatiswa lokungasilo liciniso futsi yetame kuniketa sicondziso lesicacile mayelana nendlela lesisingatsa ngayo leyo nkhulumo nasiyibona. Esigabeni ngasinye, indlela lesiyisebentisako ibonisa umetamo wetfu wekulinganisela timiso tetfu tekuveta imibono yetfu, tekuphepha, tesitfunti, tekwetsembeka, netalokuyimfihlo.
Siyakususa kwatiswa lokungemanga lapho kungenteka kutsi kufaka sandla engotini yekulimala emtimbeni lokungenteka ngekushesha. Siphindze sikususe lokufakiwe lokungenteka kufake sandla ekuphatamiseni kusebenta kwetinchubo tetepolitiki. Ekuncumeni kutsi yini leyenta kwatiswa kube ngulokungasilo liciniso kuletigaba, sisebentisana nabocwephesha labatimele labanelwati nebuciko lobusezingeni bekuhlola buciniso balokufakiwe nekutsi kungenteka yini kufake sandla engotini yekulimala lokungase kwenteke ngekushesha. Nasi sibonelo, loku kuhlanganisa kubambisana netinhlangano temalungelo ebantfu ngekuba khona eveni kute tihlole kuba liciniso kwemahemuhemu lamayelana nekungevani kwesive.
Kuko konkhe lokunye kwatiswa lokungasilo liciniso, sinaka kunciphisa kusabalala kwako nome kwakha indzawo lekhutsata kukhulumisana lokulusito. Siyati kutsi bantfu ngalokuvamile basebentisa kwatiswa lokungasilo liciniso ngetindlela letingasiyo ingoti, njengekugcizelela liphuzu ("Lelicembu linelirekhodi lelibi kakhulu emlandvweni wetemidlalo!") noma ngekuhlekisa nome kuphukuta ("Indvodza yami isandza kuwina kuba nguMyeni Wemnyaka.") Kantsi futsi bangase babelane ngalokwenteke kubo ngekusebentisa tindzaba leticuketse lokungasilo liciniso. Kuletinye timo, bantfu basakata imibono yabo lejulile labanye labayitsatsa njengalengemanga noma basakate imininingwane labakholelwa kutsi iliciniso kodvwa labanye labayibona ingakapheleli nobe ikhohlisa.
Njengobe sibona kutsi inkhulumo lenjena seyinyenti kangakanani, sinaka kakhulu kuniketa bantfu labasebentisa tinhlelo tetfu kwatiswa lokulusito nangabe kukhona kwatiswa lokungase kungabi liciniso nome lokungabadida labanye. Njengencenye yaloyo metamo, etindzaweni letingephandle kwaseMelika sisebentisana netinhlangano tetinhlelo letitsintsekako tekuhlolisisa emaciniso etincenyeni letinyenti temhlaba kute tihlole futsi tikale kunemba kwekwatiswa lokusakateka kakhulu etinhlelweni tetfu (buka lana kanye nalana kute utfole indlela lesenta ngayo eMelika). Kucala eMelika, loluhlelo Lwemaphuzu Emacembu luvumela bantfu kutsi bachaze kabanti ngalokufakiwe lokuku-Facebook, ku-Instagram naku-Threads lokungenteka kutsi kuyayengana noma kuyadida (buka <a lana). Siphindze sinikete imitfombo yelwati kute sikhulise lwati lwebantfu lwalokubukelwako nekwebucwephesha kute bancume kutsi yini labatayifundza, bayetsembe, fusti bayisakate bona matfupha. Sidzinga kutsi bantfu basho, basebentise lithulisi letfu Lebucwephesha Bemishini lekusho tintfo, nome nini nabafaka tintfo letingabhadalwa basebentisa ividiyo levela ngatsi sitfombe mbamba nome ngumsindvo lowakhiwe nome washintjwa ngetebucwepheshe, futsi singase sibahlawulise nangabe behluleka kwenta kanjalo. Singase futsi sengete luphawu ekwatisweni lokutsite lokwakhiwe noma lokushintjiwe lokwakha ingoti lenkhulu yekudukisa bantfu ngendzaba lebaluleke kakhulu kuwonkhewonkhe.
Ekugcineni, sivimbela lokufakiwe nekutiphatsa kuletinye tindzawo lokuvame kuhambisana nekusabalalisa kwatiswa lokungasilo liciniso. Nasi sibonelo, Timiso tetfu Tawonkhewonkhe atiwavumeli ema-akhawunti mbumbulu, kukhwabanisa, kanye nekubambisana emkhubeni longekho emtsetfweni.
Njengoba tindzawo letiku-inthanethi naletingakachunywa ku-inthanethi tishintja futsi tigucuka, sitawuchubeka nekutishintja letimiso. Ema-akhawunti lalibala kusakata kwatiswa lokubalwe langentansi lokungemanga, ngetulu kwekutsi atsatselwe sinyatselo kulakufakile ngekulandzela lesimiso, atawutfola kusakatwa lokuncishisiwe, imincele ematfubeni ekukhangisa, noma asuswe etindzaweni tetfu letiku-inthanethi. Imininingwane leyengetiwe lemayelana nekutsi kwentekani i-Meta nayisusa lokufakiwe ingatfolakala lana.
Ticondziso
Kwatiswa lokungasilo liciniso lesikususako:
Siyatisusa letinhlobo letilandzelako tekwatiswa lokungasilo liciniso:
I. Kulimata Lokubonakalako nome Budlova
Sisusa kwatiswa lokungasilo liciniso nome emahemuhemu langakacinisekiswa balingani betfu lababocwephesha lababone kutsi angaba nesandla ngalokucondzile esentweni seludlame nome ekulimateni bantfu ngendlela lebonakalako. Kwatiswa lokungasilo liciniso sikuchaza ngekutsi kwatiswa lokunemavi latfolwe kutsi angemanga lokuhlolwe ngulogunyatiwe wesitsatfu. Emahemuhemu langakacinisekiswa siwachaza ngekutsi angemavi balingani betfu lababocwephesha labacinisekise kutsi umtfombo wawo kumatima kuwutfola nome kutsi ngeke utfolakale, lapho kute khona imitfombo leyetsembekile, lapho kute khona kucinisekisa lokwenele kuze lowo mbono uphikiswe, nome lapho lombono kumatima kakhulu kuwukholwa nome ute ingcondvo kuze bantfu bawukholelwe.
Siyati kutsi ngaletinye tikhatsi kwatiswa lokungasilo liciniso lokungase kubonakale kungasiyo ingoti, kulenye indzaba kungaba nesandla engotini leba khona nawungakangeni ku-Facebook, lokufaka ekhatsi kusongela ngeludlame lolungabangela ingoti lenkhulu yekufa, kulimala lokumatima, nome lokunye kulimala emtimbeni. Sisebenta nelicembu lelisemhlabeni wonkhe letinhlangano letingekho ngaphansi kwahulumende (NGOs), tinhlangano letingenti inzuzo, tinhlangano letiniketa lusito, kanye netinhlangano temhlaba letinelwati kuletindzaba.
Emaveni labhekene nengoti lenkhulu yeludlame emimangweni, sisebentisana kakhulu nebalingani bendzawo kute sicondze kutsi ngukuphi lokushiwoko lokungemanga lokungaba nemtselela engotini yekulimala emtimbeni lokungase kwenteke ngekushesha. Sibese sisebentela kutfola nekususa kwatiswa lokukhuluma ngaloko etindzaweni tetfu ku-inthanethi. Sibonelo, nasichumana nabocwephesha bendzawo, singase sisuse kwatisa lokungahambelani nendzaba lokunemanga ngekukhombisa tento tebudlova, labatsintsekile noma labagcugcutela ludlame, tikhali, noma tintfo letisetjentiselwa imphi.
II. Kwatiswa Kwetemphilo Lokungasilo Liciniso Futsi Lokuyingoti
Sikhulumisana netinhlangano tetemphilo letihamba embili kuze sitfole kwatiswa lokungasilo liciniso lokungenteka kube nesandla ngalokucondzile ekulimateni imphilo nekuphepha kwesive. Kwatiswa kwetemphilo lokungasilo liciniso futsi lokuyingoti lesikususako kufaka ekhatsi loku lokulandzelako:
  • Kwatiswa lokungasilo liciniso mayelana nemijovo yekugoma. Siyakususa kwatiswa lokungasilo liciniso ngalokuyinhloko lokumayelana nemijovo yekugoma nangabe tikhulu tetemphilo tincuma kutsi loko kwatiswa kungemanga futsi kungenteka kubangele bantfu kutsi bangafuni kugoma. Kufaka ekhatsi kutsi:
    • Imijovo yekugoma ibangela sifo sengcondvo: (Sibonelo: "Kukhula kwelizinga lekugoma ngiko lokubangela bantfwana labanyenti kutsi babe nesifo sengcondvo kulamalanga.”)
    • Imijovo yekugoma ibangela kufa kwetinswane ngesizatfu lesingatiwa (Sibonelo: "Awati yini kutsi imijovo yekugoma ibangela kufa kwetinswane ngesizatfu lesingatiwa?"
    • Imijovo yekugoma ibangela lesifo bantfu labasuke bagonyelwa sona, nome ibangela kutsi abe makhulu ematfuba ekutsi umuntfu logonywako atfole leso sifo (Sibonelo: "Kwemukela umjovo wekugoma ecinisweni kukhulisa ematfuba ekutfola lesifo njengobe sisuke sifakiwe leso sifo kuwo. Caphela!")
    • Imijovo yekugoma nome loko leyakhiwe ngako kuyabulala, kunebutsi, kunashevu, kuyingoti (Sibonelo: "Kulungile, ungagoma, nangabe ute inkinga ngekufaka shevu emtimbeni wakho.")
    • Kuvikeleka ngekwemvelo kuphephile kunekutivikela ngemijovo yekugoma (Sibonelo: "Kuphephile kuvele nje utfole lesifo kunekugoma.")
    • Kuyingoti kutfola imijovo yekugoma leyehlukehlukene ngesikhatsi lesifishane, ngisho nome leso sikhatsi sinconywa betemphilo (Sibonelo: "Ungemukeli umjovo wekugoma longetulu kwamunye ngasikhatsi sinye, loko kuyingoti - anginandzaba kutsi dokotela wakho ukutjelani!")
    • Imijovo yekugoma ayisebenti ekuvikeleni lesifo lokutsiwe itasivikela. Nanobe kunjalo, emijoveni yekugomela i-COVID-19, umkhuhlane, namalaleveva, asiyisusi imibono letsi leyo mijovo ayisebenti ekuvikeleni umuntfu kutsi angawatfoli lawo magciwane. (Tibonelo: Susa – "Umjovo wekugomela vendle awenti lutfo ekukuvimbeleni kutsi ungasitfoli lesifo"; Susa – "Imijovo yekugoma ecinisweni kute lekwentako kuze ikuvikele ekutfoleni tifo"; Vumela – "Imijovo yekugoma ayikuvimbeli kutsi ungenwe yi-COVID-19, kungako solo kudzingeka kutsi ukhweshelane nalabanye futsi ufake sifonyo nawuseceleni kwalabanye bantfu.")
    • Kutfola incubulunjwane angeke kumbulale umuntfu (kudzingeka kwatiswa lokwengetiwe kanye/nome ingcikitsi yendzaba) (Sibonelo: "Ungakhatsateki ngekutsi uyayitfola incubulunjwane nome cha, ayibulali.")
    • Vitamin C usebenta kahle njengemijovo yekugoma ekuvikeleni tifo letinemijovo yekugoma.
  • Kwatiswa lokungasilo liciniso mayelana nemphilo ngesikhatsi sesimo lesiphutfumako semphilo. Sisusa kwatiswa lokungasilo liciniso ngesikhatsi sesimo lesiphutfumako semphilo nangabe tiphatsimandla tetemphilo tiphetsa ngekutsi lemininingwane ingemanga futsi ingase ngalokucondzile ifake sandla ekulimaleni lokubonakalako, lokufaka ekhatsi kufaka sandla engotini yekutsi labatsite batfole noma basakate sifo lesilimatako noma bale umjovo wekugoma lohambisana naso. Sibuka timo letiphutfumako tetemphilo yesive ngekubambisana netikhulu tetemphilo emhlabeni wonkhe naseveni.
  • Kukhutsata nobe kugcugcutela kwelapha kugula ngetindlela letisimangaliso letiyingoti emphilweni. Loku kufaka ekhatsi kwelashwa lapho khona kusetjentiswa kwako etindzabeni tekwelashwa, kungenteka kube nesandla engotini yekulimala nome kufa, futsi lokwelashwa kungasetjentiswa ngalokusemtsetfweni kutemphilo (sibonelo: i-bleach, sibulala magciwane, i-black salve, i-caustic soda).
III. Kuphatamisa Kuvota nome Lubalo
Emetameni yekukhutsata kwetsembeka elukhetfweni naselubalweni, siyakususa kwatiswa lokungasilo liciniso lokungenteka kube nesandla ngalokucondzile ekuphatamiseni kuhlanganyela kwebantfu kulemisebenti. Loku kuhlanganisa naku lokulandzelako:
  • Kwatiswa lokungasilo liciniso mayelana nemalanga, tindzawo, tikhatsi, kanye netindlela tekuvota, kubhaliswa kwalabavotako, nome kuhlanganyela elubalweni.
  • Kwatiswa lokungasilo liciniso mayelana nekutsi ngubani longavota, lokufanele uhlangabetane nako kuze uvote, kutsi livoti litawubalwa yini, nekutsi ngumiphi imininingwane noma tintfo lokufanele tiphatfwe kuze kuvotwe.
  • Kwatiswa lokungasilo liciniso mayelana nekutsi umuntfu ulungenele lukhetfo nome cha.
  • Kwatiswa lokungasilo liciniso mayelana nekutsi ngubani longahlanganyela elubalweni nekutsi ngukuphi kwatiswa nome tintfo lokufanele umuntfu abe nato kuze ahlanganyele.
  • Kwatiswa lokungasilo liciniso mayelana nekuhlanganyela kwahulumende elubalweni, lokuhlanganisa kutsi lapho kufanele khona, imininingwane yemuntfu yelubalo itawunikwa lenye inhlangano yahulumende (lengasebenti ngelubalo).
  • Kwatiswa lokungemanga nome lokute sicinisekiso lokutsi i-U.S. Immigration and Customs Enforcement (ICE) isendzaweni yekuvotela.
  • Emanga lasebaleni latsi bantfu batawutfola i-COVID-19 (nome lesinye sifo lesitsatselwanako) nangabe bahlanganyela ekuvoteni.
  • Kumangalelwa ngemanga ngesimo lesikhona nyalo endzaweni yekuvotela eMelika lokungenta kutsi kungavotwa, njengobe kucinisekiswe ngumphatsi welukhetfo.
Sinetimiso letengetiwe letihloselwe kusebenta etindzabeni tekugcugcutela ludlame, tekukhutsata kuhlanganyela lokungekho emtsetfweni, nekubambisana ekuphatamiseni lukhetfo, letitfolakala kuletinye tincenye teTimiso tetfu Tawonkhewonkhe.
Kulokwatiswa lokulandzelako, sifaka sigcebhezane lesinemininingwane:
Kwatiswa Lokumoshiwe
Kwatiswa kungashintjwa ngetindlela letehlukehlukene. Etimeni letinyenti, lolushintjo alusiyo ingoti, njengekwatiswa lokujutjiwe nome lokuncishisiwe ngesizatfu sekuveta buciko nome nakunemculo lofakwako. Kuletinye timo, lolushintjo alubonakali futsi lungayenga.
  • Kwatiswa Lokwakhiwe Ngetintfo Tebucwephesha nobe Kwashintjwa Futsi Lokungayenga Bantfu Kulokufakiwe lokungashayisani neTimiso Tawonkhewonkhe, singase sifake luphawu lolunemininingwane kulolokufakiwe – noma sikwale lokufakiwe lokusikhangiso – lapho lokufakiwe kungatsi kusitfombe noma ividiyo yentfo mbamba, noma kungulokulalelwako lokufana nalokungiko mbamba, lokwakhiwa noma kwalungiswa ngetebucwephesha futsi lokwakha ingoti lenkhulu ikakhulukati yekukhohlisa bantfu ngendzaba lebaluleke kakhulu kuwonkhewonkhe.
Indlela labaphatseka ngayo labasebentisa loluhlelo
Buka tibonelo tekutsi kuba njani nangabe bantfu batsatselwe tinyatselo ku-Facebook njengekutsi: kuba njani nawubika intfo locabanga kutsi akukafaneli ibe ku-Facebook, nawutjelwa kutsi wephule Timiso tetfu Tawonkhewonkhe nalapho ubona secwayiso ngalokutsite lokufakiwe.
Naka naku: Sihlale sitfutfuka, ngako lokubona lana kungenteka sekuphelelwe sikhatsi nakucatsaniswa naloko lesikusebentisako nyalo.
INDLELA LABAPHATSEKA NGAYO LABASEBENTISA LOLUHLELO
Kubika
INDLELA LABAPHATSEKA NGAYO LABASEBENTISA LOLUHLELO
Kuchumana ngemuva kwekubika lokufakiwe
INDLELA LABAPHATSEKA NGAYO LABASEBENTISA LOLUHLELO
Indlela bantfu labaphatseka ngayo nakususwa lobekufakiwe
INDLELA LABAPHATSEKA NGAYO LABASEBENTISA LOLUHLELO
Ema-screen laveta tecwayiso
Kutsatsa sinyatselo
Sisebentisa timiso letifanako emhlabeni wonkhe, kubo bonkhe bantfu labasebentisa i-Facebook.
Emacembu labuketako
Licembu letfu lelisemhlabeni wonkhe lelinemalunga langetulu kwa-15 000 labuketa lokufakiwe lisebenta onkhe malanga kute ligcine bantfu baphephile kaFacebook.
Kusebentisana nemalunga lesibambisene nawo
Tingcweti tangephandle, tifundziswa, Tinhlangano Letingasito Tahulumende kanye nebantfu labakha timiso bayaseluleka mayelana neTimiso Tawonkhewonkhe TakaFacebook.
Tfola lusito ngekwatiswa lokungasilo liciniso
Fundza kutsi ungenta njani nangabe ubona lokutsite ku-Facebook lokushayisana neTimiso Tetfu Tawonkhewonkhe.
Vakashela Indzawo Yetfu Yekutfola Lusito