Kutiphatsa Lokuveta Inzondo

Imininingwane Yesimiso
Indlela Labaphatseka Ngayo Labasebentisa Loluhlelo
Kwatiswa

Imininingwane yesimiso

LUSHINTJO KULOKWENTIWE
Inhloso Yesimiso
Sikholelwa kutsi bantfu bakhuluma ngekukhululeka futsi bachumana ngalokukhulu kukhululeka nangabe bangativa bahlaselwa ngekutsi babobani. Kungako singakuvumeli kutiphatsa lokuveta inzondo ku-Facebook, ku-Instagram naku-Threads.
Kutiphatsa lokuveta inzondo sikuchaza ngekutsi kuhlasela bantfu ngalokucondzile — hhayi imibono nobe tinhlangano — lokusekelwe kuloko lesikubita ngekutsi tici letivikelwako (PCs): buhlanga, buve, imvelaphi yebuve, kukhubateka, inkholo, sigaba, bulili lobukukhangako, bulili, bulili lobukhetsako kanye nesifo lesimatima. Ngetulu kwaloko, iminyaka yemuntfu siyitsatsa njengesici lesivikelwako nangabe isetjentiswe kanye nalesinye sici lesivikelwako. Siphindze sivikele bakhoseli, bantfu labatfutsile, bantfu labatfutsele kulamanye emave nalabacela kukhoseliswa ngenca yekuhlaselwa lokukhulu (Sigaba 1 ngentasi), nanome sikuvumela kuphawula ngetimiso tekutfutsela kulamanye emave nekutigceka. Ngendlela lefanako, siyativikela tintfo letite umtsetfo lotivikelako, njengemisebenti, nangabe tisetjentiswe kanye nalesinye sici lesivikelwako. Ngaletinye tikhatsi, kuye ngemehluko lomncane wendzawo, sitsatsa emagama latsite nome imishwana njengemagama lavame kusetjentiswa kute amelele tici letivikelwako.
Siyayisusa inkhulumo lelulatako, tinsolo tekutiphatsa kabi ngekwelicansi noma tebugengu, kanye netinhlamba. Siphindze singakuvumeli kusetjentiswa kwemibono leyingoti, leyo lesiyichaza ngekutsi kucatsanisa lokululatako lokunemlandvo wekusetjentiselwa kuhlasela, kwesabisa, nome kubandlulula licembu lelitsite, futsi lokuvame kuhlotjaniswa neludlame lolwenteka ngephandle kwe-inthanethi. Kwekugcina, siyatisusa tinhlamba letinkhulu, emavi laveta kwenyanya, kuhlambalata kanye nekugcugcutela kutehlukanisa noma lubandlululo nangabe kucondziswe kubantfu kuye ngetici letivikelwako. Sehlukanisa lenkhulumo ibe tigaba letimbili kuye ngekutsi yimbi kangakanani, njengoba kuchazwe ngentasi.
Siyanaka kutsi ngaletinye tikhatsi bantfu basakata tintfo letinenhlamba nome inkhulumo yalotsite kute bayigceke nobe bayibike. Kuletinye timo, emavi langase ngandlela tsite ephule timiso tetfu, lafaka ekhatsi inhlamba angasetjentiswa ngumuntfu kute abhekise kuye ngekwakhe nome ngenjongo yekukhutsata labanye. Siyaluvumela loluhlobo lwenkhulumo nangabe icacile inhloso yaloyikhulumile. Nangabe kungacaci kutsi iyini inhloso, singahle sikususe loko lokufakiwe.
Ngaletinye tikhatsi bantfu basebentisa lulwimi lolucondzene nebulili bemuntfu nabakhuluma ngekungena etindzaweni letivame kusetjentiswa bantfu bebulili lobutsite, njengetindzawo tangansense, tikolwa, umbutfo wemphi, temtsetfo, noma kufundzisa kanye netemphilo noma emacembu lasitako. Ngaletinye tikhatsi, bagcugcutela kucwayana noma basebentise lulwimi lolunenhlamba nangabe bakhuluma ngetepolitiki noma tenkholo, njenganabakhuluma ngemalungelo etitabani, kutfutsela kulelinye live noma kutsandzana kwebantfu bebulili lobufanako. Kwekugcina, ngaletinye tikhatsi bantfu bahlambalata bulili lobutsite ngenca yekwehlukana kwetitsandzani. Timiso tetfu takhiwe ngendlela yekutsi tiluvumele loluhlobo lwenkhulumo.
Ungafaki:
Sigaba 1
Kwatiswa lokubhaliwe noma lokubonakalako lokubhekiswe kumuntfu nome ecenjini lebantfu (ngaphandle kwemacembu lachazwa ngekutsi ente bucala lobubudlova nome bucala betemacansi nome lamelela incenye lengephansi kwehhafu yelicembu) ngenca yesici noma tici letivikelwako lesetibaliwe nome simo sekutfutsela kulelinye live lokunaloku:
  • Inkhulumo lelulatako lefananisa bantfu naletinye tintfo noma netilwane, emagciwane noma letinye tintfo letisesigabeni lesiphansi kunebantfu, lokufaka ekhatsi:
    • Tilokatana (lokuhlanganisa emaphela, tintsetse, kodvwa kungagcini lapho)
    • Tonkhe tilwane nome luhlobo lolutsite lwetilwane ngekwelisiko letitsatfwa njengaletiphansi (lokuhlanganisa loku kodvwa kungagcini kuko: Bantfu labamnyama netimfene nome tilwane letifana netimfene; NemaJuda nemagundvwane; NemaSulumane netingulube; Nebantfu base-Mexico netibungu)
    • Nemagciwane, nome tilwanyana
    • Nesigaba lesiphansi kunebantfu (lokufaka ekhatsi loku: tilwane letiyingoti, bodeveli, tilwane letinkhulu letesabekako, kodvwa hhayi kona kuphela)
  • Tinsolo tekutiphatsa kabi kakhulu ngekwelicansi nebugebengu:
    • Badlwenguli nalabahlukubeta bantfwana ngekwelicansi (lokufaka ekhatsi: emaSulumane lalala timbuti noma tingulube, kodvwa hhayi loko kuphela)
    • Tigebengu letineludlame (lokufaka ekhatsi: emaphekula, babulali, kodvwa hhayi loko kuphela)
  • Kugcugcutela nekufuna kutsi kwenteke naku lokulandzelako lokuyingoti (kusongela lokukhulu noma lokucondzile kanye nekugcugcutela ludlame kukhulunywa ngako esimisweni setfu lesimayelana neLudlame Nekukhutsata Kwephula Umtsetfo):
    • Kungenwa sifo
    • Kwehlelwa yinhlekelele yemvelo
    • Kutilimata noma kutibulala
    • Kufa ngaphandle kwekutsi kube khona lokubangele nobe indlela lesetjentisiwe
    • Tingoti nobe letinye tintfo letilimata bantfu letingakabangelwa ngumuntfu nobe letibangelwe sithico
  • Tinkholelo letiyingoti ngekwemlandvo letihlobene nekwesabisa nome ludlame, njengeKupenda Buso Bube Mnyama; Kuphika kutsi kwake kwaba khona kucotfulwa kwesive; kutsi emaJuda ngiwo lalawula tetimali, tepolitiki, nome imitfombo yetindzaba; nekubhekisela kuma-Dalits ngekutsi atisebenti letenta umsebenti lophansi; kanye nekucatsanisa bantfu Labamnyama nemathulusi ekusebenta emasimini.
  • Kuhlekisa ngembono, tentakalo nome ngebantfu labavelelwe bugebengu lobunenzondo ngisho nome kute bantfu mbamba labavetwe esitfombeni.
  • Kuhlekisa ngebantfu ngekuba nesifo lesitsite.
  • Kwatiswa lokuchaza noma lokucondziswe kabi kubantfu ngetinhlamba. Tinhlamba tichazwa ngekutsi ngemagama lakha simo sekukhishelwa ngaphandle nekwesabisa bantfu kuye ngesici lesivikelwako, ngalokuvamile ngobe lamavi ahlobene nemlandvo wekubandlulula, kucindzetelwa, neludlame.
Sigaba 2
Lokufakiwe lokubhekiswe kumuntfu nome ecenjini lebantfu ngenca yesici noma tici tabo letivikelwako (kungaba ngulokubhaliwe nobe lokubonakalako):
  • Kugcugcutela noma kukhutsata kukhiphela lotsite ngaphandle noma kubandlulula noma emavi lashiwo ngenhloso yekukhiphela lotsite ngaphandle noma kubandlulula, lokuchazwe ngekutsi:
    • Kukhiphela lotsite ngephandle lokuvamile, lokusho kukhutsata kukhiphela umuntfu ngephandle ngendlela levamile, njengekutsi, “X akakavumeleki!”
    • Kungavunyelwa kungenela tepolitiki, lokusho kwemukwa lilungelo lekuba nencenye kutepolitiki noma kuphikisana ngekuboshwa noma kwemukwa emalungelo etepolitiki.
    • Kungemukelwa ngenca yesimo semnotfo, lokusho kuvimbela umuntfu kutsi atfole tintfo lanelilungelo kuto kutemnotfo kanye nekunciphisa ematfuba ekutfola umsebenti lomfanele. Siyakuvumela kwatiswa lokumayelana nekungavumeleki kwenta lokutsite ngenca yebulili embutfweni wemphi, kutemtsetfo nasemisebentini yekufundzisa. Loko siphindze sikuvumele nakulabakhangwa bulili lobutsite, nangabe loko kwatiswa kusekelwe etinkholelweni tenkholo.
    • Kungemukelwa ngenca yesimo setenhlalo, lokusho tintfo letifana nekwalela umuntfu kutsi angene etindzaweni (letibonakalako nome ku-inthanethi) futsi angalutfoli lusito lwetenhlalakahle, ngaphandle kwekukhishelwa ngaphandle etindzaweni letitsite ngenca yebulili, njengetindlu tangansense, temidlalo nemacembu etemidlalo, temphilo nemacembu lasitako kanye netikolwa letitsite.
  • Tinhlamba, lokufaka ekhatsi leto letimayelana:
    • Nebuntfu, lokufaka ekhatsi kumangalelwa ngekuba ligwala, kungetsembeki, kuba sigebengu, kutiphatsa lokulihlazo nome letinye tinhlobo tekutiphatsa kabi kwelicansi, kodvwa kungagcini kuloko kuphela.
    • Nesimo sengcondvo, lokufaka ekhatsi kumangalelwa ngekuba silima, ngelizinga lekukhalipha kwengcondvo, ngekugula ngengcondvo kanye nekucatsaniswa lokute bufakazi kwemacembu langaphoci muntfu lobukeleka phansi kuye ngelizinga lekukhalipha kwengcondvo lokulufuto, kodvwa kungagcini kuloko kuphela. Siyativumela tinsolo tekutsi umuntfu ugula ngengcondvo noma wenta lokungakavami nangabe loko kusekelwe ebulilini lobumkhangako, kuye ngekwepolitiki nangekwenkholo mayelana nebulili labukhetsako kanye nekutsandzana nemuntfu webulili lobufanako kanye nekusetjentiswa ngendlela lengalimati kwemagama lanjengalatsi “kuphambene nemvelo.”
    • Naletinye timo, lokufaka ekhatsi kutsi umuntfu akasilutfo, uyintfo lengenamsebenti, mubi, ungcolile, kodvwa hhayi kona kuphela.
  • Emavi laveta kutsi loyomuntfu ubangelana kugula, lokufaka ekhatsi latsi “uyangihlantisa,” kodvwa hhayi wona kuphela.
  • Kwetfuka lokucondziswe kulotsite, ngaphandle kwekwetfuka lokuhlobene nebulili etindzabeni tekwehlukana kwalabatsandzanako, lokuchazwa ngekutsi:
    • Kusetjentiswa kweligama lelitsi “fuck” libe licondziswe kumuntfu noma kusetjentiswa ngetindlela letehlukile kwaleligama lelitsi “fuck” ngenhloso yekwetfuka, njengekutsi “Fuck the [sici lesivikelwako]!”
    • Emagama nome emavi lasetjentiselwa kucela kulalana nalotsite, nome kutsintsa sitfo sangasese, sitfo sekutikhulula, emangcoliso nome umchamo, lokufaka ekhatsi kutsi: munya sitfo sami sangasese, cabuza tibunu tami, dlani emangcoliso, kodvwa hhayi kona kuphela.
KuleTimiso Tawonkhewonkhe letilandzelako, sidzinga imininingwane leyengetiwe futsi/noma lokutsite lokufakiwe kuze sitsatse sinyatselo:
Ungafaki:
  • Kwatiswa lokuveta ngalokusebaleni nome lokuniketa tintfo nome lusito loluhloselwe kushintja bulili bantfu labakhangwa ngibo nome bulili babo.
  • Kwatiswa lokuhlasela imicondvo, tinhlangano, imibono, imikhuba, nome tinkholelo letihlobene netici letivikelwako, lokungenteka kube nesandla ekulimaleni emtimbeni, kwesabise nome kubandlulule bantfu labanaleso sici lesivikelwako. I-Meta ibuka timphawu letinyenti kute incume kutsi bukhona yini bungoti kulolokufakwako. Loku kufaka ekhatsi leti kodvwa hhayi tona kuphela: kwatiswa lokungasusa ludlame nome kwesabise; kutsi kunekungevani lokukhona lokubangelwa lukhetfo nome lokunye kushayisana lokuchubekako; ngisho nome kunemlandvo weludlame lolubhekiswe ecenjini lelitsite lelivikelwako. Kuletinye timo, singase sikubuke nekutsi loyo lokhulumako ungumuntfu lodvumile yini nome unesikhundla lesitsite.
Kuletinye timo, sitakuvumela lokufakiwe lokungase kwephule Timiso Tawonkhewonkhe ngandlela tsite nangabe kuncunywa kutsi lolokufakiwe kuyaphukuta. Lokufakiwe kutawuvunyelwa kuphela nangabe lolokwephula umtsetfo kuloko lokufakiwe kugcekwa noma kubhekiswe kulokutsite noma kumuntfu lotsite kuze kuhlekiswe ngaye noma agcekwe.
Naka: nangabe usebentisa tinhlelo tetfu usemaveni eNhlangao Yemave AseYurophu, futsi ubona lokufakiwe lova shengatsi kwephula umtsetfo lomayelana nenkhulumo leveta inzondo eveni lakini, ungatfumela sicelo lesisemtsetfweni sekutsi kususwe ku-Facebook nomaku-Instagram.
Indlela labaphatseka ngayo labasebentisa loluhlelo
Buka tibonelo tekutsi kuba njani nangabe bantfu batsatselwe tinyatselo ku-Facebook njengekutsi: kuba njani nawubika intfo locabanga kutsi akukafaneli ibe ku-Facebook, nawutjelwa kutsi wephule Timiso tetfu Tawonkhewonkhe nalapho ubona secwayiso ngalokutsite lokufakiwe.
Naka naku: Sihlale sitfutfuka, ngako lokubona lana kungenteka sekuphelelwe sikhatsi nakucatsaniswa naloko lesikusebentisako nyalo.
INDLELA LABAPHATSEKA NGAYO LABASEBENTISA LOLUHLELO
Kubika
INDLELA LABAPHATSEKA NGAYO LABASEBENTISA LOLUHLELO
Kuchumana ngemuva kwekubika lokufakiwe
INDLELA LABAPHATSEKA NGAYO LABASEBENTISA LOLUHLELO
Indlela bantfu labaphatseka ngayo nakususwa lobekufakiwe
INDLELA LABAPHATSEKA NGAYO LABASEBENTISA LOLUHLELO
Ema-screen laveta tecwayiso
Kwatiswa
Hlola Umbiko Wekugcizelela Timiso Tawonkhewonkhe losandza kwentiwa
Kutsatsa sinyatselo
Sisebentisa timiso letifanako emhlabeni wonkhe, kubo bonkhe bantfu labasebentisa i-Facebook.
Emacembu labuketako
Licembu letfu lelisemhlabeni wonkhe lelinemalunga langetulu kwa-15 000 labuketa lokufakiwe lisebenta onkhe malanga kute ligcine bantfu baphephile kaFacebook.
Kusebentisana nemalunga lesibambisene nawo
Tingcweti tangephandle, tifundziswa, Tinhlangano Letingasito Tahulumende kanye nebantfu labakha timiso bayaseluleka mayelana neTimiso Tawonkhewonkhe TakaFacebook.
Tfola lusito mayelana nekutiphatsa lokuveta inzondo
Fundza kutsi ungenta njani nangabe ubona lokutsite ku-Facebook lokushayisana neTimiso Tetfu Tawonkhewonkhe.
Vakashela Indzawo Yetfu Yekutfola Lusito