Inhloso Yesimiso
Siyati kutsi kuphepha kwebantfu labasebentisa tinhlelo tetfu kufaka ekhatsi kuphepha kwemininingwane yabo, ema-akhawunti, emafayela kanye naletinye tinhlelo labatilawulako ku-Meta, kanjalo nemikhicito yetfu kanye nelusito lesiluniketako. Kwetama kutfola imininingwane yebantfu levikelwako nome kuhlanganyela etindleleni letiyengako nome letiphocelelako tekukutfola kuyingoti kulesimo sekwetsembeka, lesikhululekile futsi lesiphephile lesifuna sibe khona.
Asikuvumeli:
Kwetama kuphatamisa nome kungena kuma-akhawunti ngetindlela letingakavumeleki, lokufaka ekhatsi:
Kungena kuma-akhawunti, emafayeleni, noma kuletinye tinhlelo taka-Meta letingasito takho ngetindlela tekuyenga nobe ngaphandle kwemvume levela kumnikati we-akhawunti, welifayela, nome weluhlelo.
Kunikwa, kutfola noma kucela imininingwane yekungena yalomunye umuntfu, imininingwane yakhe, nome leminye imininingwane lebucayi ngenjongo yekutsi uyisebentisele kungena ngalokungekho emtsetfweni, lokufaka ekhatsi nganankha emachinga lalandzelako:
Kweba imininingwane lebucayi, lokuchazwa ngekutsi sento sekwakha tindlela tekuchumana nome emakhasi e-inthanethi lentiwe abukeka netindlela tekuchumana nome emakhasi e-inthanethi letsenjwa kakhulu nome lahlonishwako ngenhloso yekutfola imininingwane yemuntfu lebucayi ngebucili.
Bucili betebucwephesha kutekuchumana, njengemetamo lephindzaphindzako nome lephikelelako yekutfola timphendvulo letimayelana nemibuto levamile yekuvusetela ema-akhawunti.
Tinhlelo te-Malware, i-Greyware, i-Spyware noma lamanye emakhodi layingoti, njengobe kuchazwe ngentasi.
Imetamo yekusakata, kwakha, kulawula, nome kutfumelela labanye emakhodi layingoti, lokufaka ekhatsi:
Kukhutsata nome kuyenga labanye kutsi badawunilode nome bavule emafayela, tinhlelo, nome ticondziso letitakubeka engotini kuphepha kwemininingwane yemuntfu leku-inthanethi, lokufaka ekhatsi kodvwa lokungagcini kuloku:
Luhlelo lwe-Malware, luchazwa ngekutsi yikhodi noma yi-software leyakhelwe kulimata noma kutfola imvume yekungena ngalokungekho emtsetfweni etintfweni tebucwephesha. Loku kufaka ekhatsi tinhlelo letakhelwe kutsi tilimate bongcondvomshini, kanye nema-software lakhelwe kutsi advonse imali kubantfu, njengeluhlelo lolukuvimba ungakhoni kungena uze ubhadale imali.
Luhlelo lwe-Spyware, luchazwa ngekutsi yikhodi noma yi-software lekoleka imininingwane yebantfu iyitfumelele kulababambisene nabo ngaphandle kwemvume yemnikati we-akhawunti, noma iyisebentisele tinjongo letingekho emtsetfweni (nasi sibonelo, kucindzetelwa kuveta titfombe tebungcunu, kwesabisa, kungena emishinini ngalokungekho emtsetfweni)
Tinhlelo te-Greyware, tichazwa ngekutsi yikhodi noma yi-software lephazamisa kusebenta kwangcondvomshini noma kwe-software futsi kungahle kube matima kuyikhipha kulongcondvomshini noma ku-network.
Kwakha, kusakata nome kusebentisa i-software leyingoti lokufaka ekhatsi emakhasi ekufuna ku-inthanethi latfutfukisiwe kanye netinhlelo letisemishinini lephatfwako, lokusendzaweni leku-inthanethi nome lokungekho kuyo lokubabeka engotini bantfu labasebentisa tinhlelo tetfu nome imikhicito yetfu netinhlelo tetfu tekuniketa lusito.
Kusongela, kuvuma, nome kwenta kutsi kugcekezwe ngekusakata noma ngekukhangisa ema-software, tifundvo nome tinhlelo letenta bantfu bakhone kutsi ngebucili batfole indlela yekubalekela kuphepha kwemishini, lokufaka ekhatsi ema-software lakhutsata kugcekeza ema-software, noma imininingwane yebantfu
Kuniketa tindlela tekutfola i-inthanethi, lokufaka ekhatsi kusekela emakhasi e-inthanethi, imishini yekugcina imininingwane ye-domain kanye netindlela tekukhangisa letiveta emalinki lahlukubeta bantfu lokungabangela kutsi linyenti lalawo malinki lasetinhlelweni tetfu telusito lephule Timiso Tawonkhewonkhe letimayelana nekwatiswa lokungakafaneli nome tekuphepha ku-inthanethi.