Timiso Tawonkhewonkhe
Setfulo
Letimiso tisekelwe kulokubonwe bantfu nasetelulekweni lesitinikwe tingcweti tebucwephesha, tekuphepha kwawonkhewonkhe netemalungelo ebantfu. Kute siciniseke kutsi imibono yabo bonkhe bantfu itsatfwa njengalebalulekile, senta konkhe lokusemandleni kute sakhe timiso letihlanganisa imibono netinkholelo letehlukahlukene, ikakhulukati leyo levela kubantfu nasemacenjini lavame kubukelwa phansi nobe labonakala angakabaluleki.
Malanga onkhe, bantfu basebentisa i-Facebook, i-Instagram, i-Messenger kanye ne-Threads kute bacoce ngalokwentekile kubo, bachumane netihlobo nebangani, futsi bakhe emacembu. Tinhlelo tetfu tisita bantfu labatigidzigidzi kutsi bakhulume ngekukhululeka emaveni nasemasikweni lehlukehlukene kanye nangetilwimi letehlukehlukene.
I-Meta iyati kutsi kubaluleke kangakanani kutsi i-Facebook, i-Instagram, i-Messenger kanye ne-Threads ibe yindzawo lapho bantfu bativa bakhutsatwa kutsi bakhulume, futsi siwutsatsa njengalobaluleke kakhulu umsebenti wetfu wekugcina loluhlelo lute kuhlukumetana. Nguleso sizatfu lesenta kutsi sakhe timiso talokwemukelekako nalokungemukeleki kuletinhlelo.
Sicela ninake kutsi luhlelo lwesiNgisi saseMelika lweTimiso Tawonkhewonkhe ngilo loluveta timiso letihambisana nesikhatsi futsi kufanele kube ngilo lolusetjentiswako ngalokuyinhloko.
Kutimisela kwetfu kwemukela imibono
Umgomo weTimiso Tetfu Tawonkhewonkhe kwakha indzawo yekutsi bantfu bakhululeke kukhuluma futsi bavete imibono yabo. I-Meta ifuna bantfu bakhululeke kukhuluma ngetindzaba letibatsintsako, kungaba kutsi basebentisa lokubhaliwe, titfombe, umculo, noma letinye tindlela tebuciko ngisho nobe labanye bangase baphikisane nato nobe batibone tingakafaneli. Kuletinye timo, siyakuvumela kwatiswa lebesingakutsatsa njengalokushayisana netimiso tetfu, nangabe kufanele kubikwe njengetindzaba futsi kutawuba lusito kubantfu. Loku sikwenta kuphela nasisebuke kutsi kulusito kangakanani kubantfu nakucatsaniswa nekuba yingoti kwako, futsi sibuka timiso temhlaba wonkhe temalungelo ebantfu kute sente letincumo. Kuletinye timo, singakususa kwatiswa lokusebentisa lulwimi lolungacaci noma lolucacile lapho kwatiswa lokwengetiwe kusenta sibone kutsi lokwatiswa kuphambene netimiso tetfu.
Kutimisela kwetfu kuveta imibono kubaluleke kakhulu, kodvwa siyati kutsi i-inthanethi iletsa tindlela letinsha naletitfutfukisiwe tekuhlukumeta bantfu. Ngaleso sizatfu, nangabe sinciphisa ematfuba ekuveta imibono, sisuke silandzela letimiso letilandzelako:
KWETSEMBEKA
Sifuna kuciniseka kutsi tintfo bantfu labatibonako tetsembekile. Sikholelwa kutsi kwetsembeka kwenta simo sibe kahle kuze bantfu bakhulume, futsi kungako singafuni kutsi bantfu labasebentisa tinhlelo tetfu bakhulume emanga ngaloko labangiko nobe labakwentako.
KUPHEPHA
Sitimisele kutsi sente i-Facebook, i-Instagram, i-Messenger kanye ne-Threads tibe tindzawo letiphephile. Siyakususa kwatiswa lokungaba yingoti futsi kwente bantfu bangaphephi. Kwatiswa lokusongela bantfu kungabesabisa, kubente bative bakhishelwa ngaphandle nobe kubente bangasakhulumi futsi loko akukavumeleki etinhlelweni tetfu.
LOKUYIMFIHLO
Sitimisele kuvikela tindzaba tebantfu letiyimfihlo nemininingwane yabo. Kugcinwa kwalokuyimfihlo kwenta bantfu bative bakhululekile, bakhone kukhetsa kutsi batakufaka nini futsi njani etinhlelweni tetfu baphindze bakhone kuchumana kamelula nalabanye.
SITFUNTI
Sikholelwa kutsi bonkhe bantfu banesitfunti nemalungelo lalinganako. Silindzele kutsi bantfu basihloniphe sitfunti salabanye futsi bangabahlukumeti nobe babente bative bangasilutfo.
Timiso Tawonkhewonkhe
Timiso tetfu Tawonkhewonkhe tisebenta kubo bonkhe bantfu emhlabeni wonkhe, nakuto tonkhe tinhlobo tetintfo letifakwako, lokufaka ekhatsi letifakwa ngetebuchwepheshe bangcondvomshini.
Incenye ngayinye yeTimiso tetfu Tawonkhewonkhe icala "Ngenhloso Yesimiso" lechaza tinhloso taleso simiso bese kulandzela timiso leticondzile letiveta:
Kwatiswa lokungakavumeleki; kanye
Nekwatiswa lokudzinga imininingwane leyengetiwe nobe inchazelo kute kutsatselwe sinyatselo, kwatiswa lokuvunyelwe kutsi kuvele nesecwayiso nobe kwatiswa lokuvunyelwe kepha lokufanele kubukwe bantfu labaneminyaka lengu-18 budzala kuya etulu kuphela.