Ndihma për adoleshentët që të shikojnë përmbajtje të përshtatshme për moshën

PËRDITËSUAR 4 MAJ 2026
Ne dëshirojmë që adoleshentët të kenë eksperienca të sigurta dhe pozitive në Facebook dhe Instagram, në të cilat përfshihen ndihma që u japim për të eksploruar interesat e tyre ndërkohë që u shfaqim përmbajtje që janë të përshtatshme për moshën e tyre. Ne punojmë për t'i penguar adoleshentët të shikojnë përmbajtje të papërshtatshme në tre mënyra kryesore: duke i hequr plotësisht përmbajtjet kur shkelin rregullat tona, duke ua fshehur adoleshentëve disa lloje përmbajtjesh delikate ose për të rritur dhe duke pasur një standard më të rreptë për ato që rekomandojmë.
Ne po e zhvillojmë vazhdimisht qasjen tonë për të na ndihmuar që të sigurohemi se po u ofrojmë adoleshentëve eksperienca të sigurta dhe të përshtatshme për moshën dhe për të inkorporuar studimet më të mira të mundshme dhe këshillat e ekspertëve për t’u dhënë sa më shumë qetësi prindërve. Ne dëshirojmë gjithashtu të përputhemi më shumë me një standard të pavarur që është tashmë i njohur për familjet, prandaj rishikuam udhëzimet tona të përshtatshme për moshën - udhëzimet që përcaktojnë se cilat përmbajtje fshehim nga adoleshentët dhe shmangim rekomandimin për to - kundrejt klasifikimeve të filmave për moshat mbi 13 vjeç dhe reagimeve të prindërve. Kjo do të thotë që objektivi ynë është që adoleshentët të shikojnë përmbajtje në Instagram dhe Facebook që janë të ngjashme me ato që do të shikonin në një film të përshtatshëm për moshën e tyre, sipas parazgjedhjes
Ashtu siç mund të shikoni disa përmbajtje me sugjerime seksuale ose të dëgjoni gjuhë të ashpër në një film të klasifikuar si të përshtatshëm për moshat mbi 13 vjeç, adoleshentët mund të shikojnë herë pas here diçka të tillë në Instagram ose/dhe Facebook - por ne do të vazhdojmë të bëjmë çdo gjë që mundemi për t'i mbajtur ato raste sa më të rralla që të jetë e mundur. Ne e dimë se asnjë sistem nuk është i përkryer dhe jemi të përkushtuar që të përmirësohemi me kalimin e kohës.
Ka shumë ndryshime midis mediave sociale dhe filmave. Ne nuk punuam me MPA-në kur përditësuam parametrat tanë të përmbajtjes dhe ajo nuk vlerëson asnjë përmbajtje në Instagram ose/dhe Facebook, si dhe nuk i mbështet ose miraton parametrat tanë të përmbajtjes në asnjë mënyrë. Përkundrazi, ne u frymëzuam nga udhëzimet e MPA-së për publikun, të cilat njihen tashmë nga prindërit, si dhe nga reagimet nga prindërit. Sistemet tona të moderimit të përmbajtjeve nuk janë të njëjta me një bord për vlerësimet e filmave, kështu që eksperienca mund të mos jetë pikërisht e njëjtë.
Nivelet e shumëfishta të mbrojtjes
Për të gjithë: Ne i heqim përmbajtjet që shkelin Standardet tona të komunitetit. Ne kemi gjithashtu një standard më të lartë për llojin e përmbajtjeve që rekomandojmë.
❌ Përmbajtjet që heqim
Standardet tona të komunitetit përshkruajnë llojet e përmbajtjeve që nuk i lejojmë në Facebook dhe Instagram. Ne i heqim krejtësisht këto përmbajtje për të gjithë - duke përfshirë adoleshentët - sa herë që vihemi në dijeni për to. Kur i heqim përmbajtjet që thyejnë këto rregulla, mund të vendosim gjithashtu një njoftim paralajmërues për llogarinë që i ndau dhe i çaktivizojmë llogaritë që shkelin politikat tona në mënyrë të përsëritur dhe të rëndë. Këto politika janë hartuar për të mbrojtur çdo person në komunitetin tonë, duke përfshirë adoleshentët.
Llojet e përmbajtjeve të cilat i heqim plotësisht përfshijnë, por nuk kufizohen në sa më poshtë:
Ne nuk i lejojmë përmbajtjet që mund të abuzojnë ose të shfrytëzojnë njerëzit, të tilla si postimet që nxisin aktivitetin seksual jokonsensual ose që ndajnë ose kërkojnë materiale të abuzimit të fëmijëve. Për shembull, ne e heqim:
❌ Një postim që ofron prostitucion ose që e pyet dikë për t’i dërguar pornografi.
❌ Një fotografi të dikujt në një veprim intim ose seksual, që është ndarë pa pëlqimin e tij personi.
❌ Një postim që ofron ose kërkon materiale të abuzimit seksual të fëmijëve ose imazhe të fëmijëve lakuriq.
Ne nuk i lejojmë përmbajtjet që nxisin, lavdërojnë ose promovojnë vetëvrasjen, lëndimin e vetes ose çrregullimet e ushqyerjes, ndonëse u japim gjithsesi hapësirë njerëzve që të bisedojnë rreth eksperiencave të tyre personale dhe të kërkojnë mbështetje. Për shembull, ne e heqim:
❌ Një postim që flet me pozitivitet për vetëvrasjen, lëndimin e vetes ose çrregullimet e ushqyerjes.
❌ Një histori që shfaq lëndim grafik të vetes.
❌ Një koment që tall dikë sepse ka një çrregullim të ushqyerjes.
Ne nuk i lejojmë përmbajtjet që mund të krijojnë një mjedis frikësimi ose përjashtimi, duke përfshirë bulizmin dhe ngacmimin. Për shembull, ne e heqim:
❌ Një postim që përdor ligjërim çnjerëzor ndaj njerëzve në bazë të racës, besimit fetar, përkatësisë etnike, identitetit gjinor ose orientimit të tyre seksual.
❌ Një koment që tall viktimat e sulmit seksual.
❌ Një postim që kërcënon se do të publikojë informacione personalisht të identifikueshme (si p.sh. numrin e pasaportës) ose nxit ngacmimin e dikujt.
Ne nuk lejojmë blerjen, shitjen ose tregtimin e mallrave dhe shërbimeve të caktuara të kufizuara në platformat tona. Ne nuk i lejojmë gjithashtu njerëzit të promovojnë lloje të caktuara substancash ose të japin udhëzime për mënyrën e përdorimit të tyre. Për shembull, ne e heqim:
❌ Një histori që ofron blerjen, shitjen ose tregtimin e llojeve të ndryshme të lëndëve narkotike.
❌ Një postim ku kërkohet blerja, shitja ose tregtimi i duhanit, nikotinës ose alkoolit
❌ Një koment që ofron pjesë armësh të printuara në 3D.
Ne bëjmë disa përjashtime për bizneset e ligjshme që ofrojnë në mënyrë të ligjshme lloje të caktuara mallrash të kufizuara.
Nuk lejojmë përmbajtjet grafike ekstreme ose përmbajtjet që mund të përbëjnë kërcënim për sigurinë personale, të tilla si kërcënimet për dhunë ndaj njerëzve. Për shembull, ne e heqim:
❌ Një postim që kërcënon se do të vrasë ose do të rrëmbejë një person tjetër ose një postim që i nxit të tjerët të kryejnë dhunë.
❌ Një video grafike ku tregohet një person që po gjymtohet ose po digjet rëndë.
Ne bëjmë përjashtime të caktuara për përmbajtjet grafike në kontekstet mjekësore ose kur ndahen për të rritur ndërgjegjësimin. Në rastet kur i lejojmë përmbajtjet grafike, ne i mbulojmë zakonisht ato me një ekran paralajmërues për t’i vënë njerëzit në dijeni se përmbajtjet mund të jenë delikate para se të klikojnë tek ato.
Ne e kufizojmë shfaqjen e lakuriqësisë ose të aktivitetit seksual, si dhe gjuhën e qartë seksuale. Për shembull, ne e heqim:
❌ Një imazh ose video që përmban lakuriqësi ose aktivitet të qartë seksual, duke përfshirë ato që krijohen nga IA-ja.
❌ Një histori me përshkrime të qarta ose grafike të takimeve seksuale (përveçse nëse janë humoristike ose satirike).
Ne e kuptojmë se lakuriqësia mund të ndahet për arsye të ndryshme, duke përfshirë si formë proteste, për të rritur ndërgjegjësimin rreth një kauze ose për arsye edukimi ose mjekësore. Ne e lejojmë këtë përmbajtje kur është e përshtatshme dhe kur ky qëllim është i qartë.
Për detaje të plota për përmbajtjet që heqim, shikoni Standardet tona të komunitetit.
🛡️ Përmbajtjet që i shmangim t’i rekomandojmë
Ne bëjmë rekomandime në vende të tilla si Skenat ose Eksplorimi në Instagram ose Furnizimi i Facebook për t’i ndihmuar njerëzit që të zbulojnë përmbajtje të reja të cilat mund t’u interesojnë. Ne kemi udhëzime për llojin e përmbajtjeve që mund të rekomandohen dhe shmangim bërjen e rekomandimeve që mund të jenë me cilësi të ulët, të pakëndshme ose veçanërisht delikate - edhe kur përmbajtja nuk është aq e rëndë sa të hiqet. Kjo ndodh sepse mendojmë se duhet të ketë standarde më të rrepta kur u shfaqim njerëzve përmbajtje nga llogari, të cilat nuk i kanë zgjedhur t’i ndjekin.
⚠️ Përmbajtjet e tjera që ua fshehim adoleshentëve
Adoleshentët: Ne ofrojmë mbrojtje shtesë për adoleshentët nën 18 vjeç: Ne fshehim më shumë përmbajtje, përveç atyre që i heqim për të gjithë, dhe shmangim po ashtu t'u rekomandojmë adoleshentëve përmbajtje që janë të rekomandueshme për të rriturit. Objektivi ynë është që adoleshentët të shikojnë përmbajtje në Instagram dhe Facebook që janë të ngjashme me ato që do të shikonin në një film të përshtatshëm për moshën, sipas parazgjedhjes. Adoleshentët mund të hyjnë në një mjedis të tretë, më lejues - të quajtur Më shumë përmbajtje - me lejen e një prindi. Në Instagram, adoleshentët ose prindërit e tyre mund të zgjedhin gjithashtu një parametër më kufizues që quhet Përmbajtjet e kufizuara dhe adoleshentët mund të kenë akses vetëm në një parametër të tretë, më lejues - të quajtur Më shumë përmbajtje - me lejen e një prindi
moshat mbi 13 vjeç (parazgjedhja): Parametri i përmbajtjes për moshën mbi 13 vjeç frymëzohet nga klasifikimet e filmave për moshat mbi 13 vjeç dhe nga reagimi i prindërve, si dhe është aktiv për adoleshentët sipas parazgjedhjes. Ne kemi punuar me ekspertët për rininë në mbarë botën për të kuptuar më mirë se çfarë lloje përmbajtjesh mund të jenë të përshtatshme për të rriturit, por shumë të papërshtatshme për shkak të moshës për adoleshentët nën 18 vjeç dhe i rishikuam këto udhëzime të përshtatshme për moshën kundrejt klasifikimeve të filmave për moshat mbi 13 vjeç dhe reagimeve të prindërve. Në këtë parametër, do t'u fshehim adoleshentëve përmbajtjet shtesë përtej atyre që heqim tashmë për të gjithë. Kjo do të thotë që, ndërkohë që të rriturit do të vazhdojnë të kenë akses në këto përmbajtje, adoleshentët nuk do të mund t’i shikojnë ose të ndërveprojnë me to edhe nëse janë ndarë nga një llogari të cilën e ndjekin te Furnizimi ose te Historitë e tyre. Ne do t'i pengojmë gjithashtu adoleshentët që të mos zbulojnë, ndjekin dhe ndërveprojnë me llogaritë që ndajnë kryesisht përmbajtje që nuk janë të përshtatshme për moshën.
Klikoni këtu për të parë disa nga llojet e përmbajtjeve që do t'ua fshehim adoleshentëve në këtë parametër të parazgjedhur.
Ne fshehim përmbajtje të caktuara që lidhen me vetëvrasjen dhe lëndimin e vetes për t’i mbrojtur adoleshentët nga materialet e mundshme shqetësuese ose delikate. Për shembull, ne kufizojmë për shkak të moshës:
⚠️ Një postim ku dikush përshkruan eksperiencat e veta personale lidhur me vetëvrasjen, lëndimin e vetes ose çrregullimet e ushqyerjes, përveçse në kontekstin e shërimit.
⚠️ Një fotografi ose video ku shfaqen njerëz në një spital të përfshirë në eutanazi ose vetëvrasje të asistuar.
⚠️ Një histori ku dikush po flet për sjelljen e vet lidhur me humbjen e jashtëzakonshme në peshë.
Ne i fshehim nga adoleshentët përmbajtjet që mund t’i ndikojnë ato për t’u përfshirë në aktivitete që mund të jenë të dëmshme. Për shembull, ne kufizojmë për shkak të moshës:
⚠️ Një postim që ofron shitjen e duhanit, produkteve të nikotinës, alkoolit ose armëve të zjarrit kur ndahet nga një biznes i ligjshëm fizik.
⚠️ Një histori që i nxit njerëzit të marrin droga psikodelike (që njihen edhe si enteogjene) ose produkte të kanabisit.
⚠️ Imazhe me receta për pije alkoolike.
⚠️ Një postim që shet produkte ose shërbime të rënies në peshë.
Ne i fshehim nga adoleshentët imazhet më grafike dhe shqetësuese, edhe nëse do t’i lejonim ato të mbuluara nga një ekran paralajmërues për të rriturit. Për shembull, ne kufizojmë për shkak të moshës:
⚠️ Një fotografi të një personi me djegie të rënda, të cilën do ta mbulonim me një ekran paralajmërues për të rriturit.
⚠️ Një fotografi ose video me të shtëna armësh, brutalitet ose përplasje vdekjeprurëse makinash.
Ne u fshehim adoleshentëve përmbajtje të tjera që nuk përmbajnë lakuriqësi ose aktivitet seksual të qartë, por që mund të konsiderohen përmbajtje me sugjerime seksuale. Për shembull, ne kufizojmë për shkak të moshës:
⚠️ Një postim me pothuajse lakuriqësi, si p.sh. lakuriqësia e mbuluar me mbulesë dixhitale.
⚠️ Një fotografi të zmadhuar të vitheve të dikujt.
⚠️ Një histori me gjuhë me sugjerime seksuale që përshkruan takime seksuale, duke përfshirë përdorimin e metaforave seksuale.
Për detaje të plota për përmbajtjet që heqim, shikoni Standardet tona të komunitetit.
Ne shmangim gjithashtu rekomandimin e më shumë llojeve të përmbajtjeve, edhe nëse përputhen me klasifikimet e filmave për moshat mbi 13 vjeç dhe me reagimin e prindërve. Shumë nga përmbajtjet që shmangim t’ua rekomandojmë të rriturve janë tashmë të fshehura plotësisht për adoleshentët, por ne shkojmë më tej për adoleshentët dhe shmangim rekomandimin e llojeve shtesë të përmbajtjeve - të tilla si fotografitë ose videot që mund të shikohen si me nënkuptime seksuale, sharjet e forta ose akrobacitë e rrezikshme si p.sh. kërcimi nga lartësitë.
Përmbajtjet e kufizuara: Në Instagram, për prindërit që preferojnë kontrolle shtesë, kemi prezantuar një parametër të ri, edhe më kufizues, të quajtur Përmbajtjet e kufizuara. Kur parametri Përmbajtjet e kufizuara është i aktivizuar, do të zbatojmë më rreptësisht filtrat tona të përmbajtjeve për të fshehur edhe më shumë përmbajtje nga eksperienca e Llogarisë për adoleshentë. Gjithashtu, do të kufizojmë më tej Rezultatet e kërkimit dhe do të çaktivizojmë aftësinë e adoleshentëve për të parë, për të lënë ose për të marrë komente në postime.
Më shumë përmbajtje: Adoleshentët mund të kalojnë në parametrin "Më shumë përmbajtje" vetëm me lejen e një prindi, të cilën prindërit mund ta japin vetëm nëpërmjet mbikëqyrjes prindërore. Në këtë parametër, adoleshentët do të vazhdojnë të përfitojnë nga mbrojtjet automatike që fshehin më shumë përmbajtje për adoleshentët sesa fshehim ne për të rriturit, dhe ne do të vazhdojmë t'i heqim krejtësisht përmbajtjet nëse shkelin Standardet tona të komunitetit. Megjithatë, adoleshentëve mund t'u rekomandohen disa përmbajtje që nuk do të ishin në parametrat 13+ dhe Përmbajtjet e kufizuara, dhe ne nuk do të fshehim llogari të tëra që ndajnë përmbajtje të papërshtatshme për moshën. Parametri Më shumë përmbajtje nuk do të japë kufizimet më të rrepta për përmbajtjet në Live, Komentet dhe Kërkimi që janë pjesë e parametrave 13+ dhe Përmbajtjet e kufizuara.
Mohimi i përgjegjësisë: Ka shumë ndryshime midis mediave sociale dhe filmave. Ne nuk punuam me MPA-në kur përditësuam parametrat tanë të përmbajtjes dhe ajo nuk vlerëson asnjë përmbajtje në Instagram, si dhe nuk i mbështet ose miraton parametrat tanë të përmbajtjes në asnjë mënyrë. Përkundrazi, ne u frymëzuam nga udhëzimet e MPA-së për publikun, të cilat njihen tashmë nga prindërit, si dhe nga reagimet nga prindërit. Sistemet tona të moderimit të përmbajtjeve nuk janë të njëjta me një bord për vlerësimet e filmave, kështu që eksperienca mund të mos jetë pikërisht e njëjtë.
Si të raportoni përmbajtjet shkelëse
Ne punojmë fort për të identifikuar përmbajtjet që thyejnë rregullat tona dhe ne e gjejmë para se të na raportohen shumicën e përmbajtjeve të cilat i heqim në mënyrë proaktive duke përdorur teknologjinë tonë. Nëse shikoni diçka që nuk e kemi gjetur, na ndihmoni t’i bëjmë platformat tona një vend më të sigurt, duke e raportuar atë në Facebook ose Instagram. Të gjitha raportet janë anonime.
Burimet shtesë
Standardet tona të komunitetit përmbajnë detajet për llojet e përmbajtjeve që heqim dhe kufizojmë për shkak të moshës për çdo aspekt të politikave. Për t’i lexuar ato, klikoni këtu.
Ne kemi zhvilluar gjithashtu një teknologji që identifikon në mënyrë proaktive të rriturit që mund të jenë të dyshimtë, si p.sh. një i rritur që është bllokuar ose raportuar vazhdimisht nga adoleshentët ose nëse një i rritur kërkon vazhdimisht përmbajtje shkelëse. Ne nuk u rekomandojmë të rritur të dyshimtë adoleshentëve dhe nuk u rekomandojmë adoleshentë të rriturve të dyshimtë. Mund të lexoni më shumë rreth kësaj këtu.
Mund të lexoni më shumë për mënyrat me të cilat ndihmojmë që ta mbajmë komunitetin tonë të sigurt në Qendrën tonë të sigurisë dhe për mënyrat me të cilat i mbështesim adoleshentët dhe familjet në Qendrën tonë të familjes.