ਅੱਲ੍ਹੜ ਬੱਚਿਆਂ ਦੀ ਉਮਰ ਅਨੁਸਾਰ ਢੁਕਵੀਂ ਸਮੱਗਰੀ ਦੇਖਣ ਵਿੱਚ ਮਦਦ ਕਰਨਾ

ਅੱਪਡੇਟ ਕੀਤਾ ਗਿਆ 13 ਮਈ 2026
ਅਸੀਂ ਚਾਹੁੰਦੇ ਹਾਂ ਕਿ ਅੱਲ੍ਹੜ ਬੱਚਿਆਂ ਨੂੰ Facebook ਅਤੇ Instagram 'ਤੇ ਸੁਰੱਖਿਅਤ, ਸਕਾਰਾਤਮਕ ਅਨੁਭਵ ਹੋਣ, ਜਿਸ ਵਿੱਚ ਅੱਲ੍ਹੜ ਬੱਚਿਆਂ ਨੂੰ ਉਨ੍ਹਾਂ ਦੀਆਂ ਦਿਲਚਸਪੀਆਂ ਨੂੰ ਐਕਸਪਲੋਰ ਕਰਨ ਵਿੱਚ ਮਦਦ ਕਰਨਾ ਅਤੇ ਨਾਲ ਹੀ ਉਨ੍ਹਾਂ ਦੀ ਉਮਰ ਦੇ ਅਨੁਕੂਲ ਸਮੱਗਰੀ ਦਿਖਾਉਣਾ ਵੀ ਸ਼ਾਮਲ ਹੈ। ਅਸੀਂ ਅੱਲ੍ਹੜ ਬੱਚਿਆਂ ਨੂੰ ਅਢੁਕਵੀਂ ਸਮੱਗਰੀ ਦੇਖਣ ਤੋਂ ਰੋਕਣ ਲਈ ਤਿੰਨ ਮੁੱਖ ਤਰੀਕਿਆਂ ਨਾਲ ਕੰਮ ਕਰਦੇ ਹਾਂ: ਜਦੋਂ ਕੋਈ ਸਮੱਗਰੀ ਸਾਡੇ ਨਿਯਮਾਂ ਦੀ ਉਲੰਘਣਾ ਕਰਦੀ ਹੈ ਤਾਂ ਉਸ ਨੂੰ ਪੂਰੀ ਤਰ੍ਹਾਂ ਹਟਾਉਣਾ, ਅੱਲ੍ਹੜ ਬੱਚਿਆਂ ਤੋਂ ਕੁਝ ਖਾਸ ਕਿਸਮ ਦੀਆਂ ਪਰਿਪੱਕ ਜਾਂ ਸੰਵੇਦਨਸ਼ੀਲ ਸਮੱਗਰੀ ਨੂੰ ਲੁਕਾਉਣਾ, ਅਤੇ ਜਿਸ ਸਮੱਗਰੀ ਦੀ ਅਸੀਂ ਸਿਫ਼ਾਰਸ਼ ਕਰਦੇ ਹਾਂ ਉਨ੍ਹਾਂ 'ਤੇ ਸਖ਼ਤ ਪਾਬੰਦੀਆਂ ਲਗਾਉਣਾ।
ਅਸੀਂ ਅੱਲ੍ਹੜ ਬੱਚਿਆਂ ਨੂੰ ਸੁਰੱਖਿਅਤ, ਉਮਰ ਅਨੁਸਾਰ ਢੁਕਵੇਂ ਅਨੁਭਵ ਪ੍ਰਦਾਨ ਕਰਨ ਸੰਬੰਧੀ ਯਕੀਨੀ ਬਣਾਉਣ ਵਿੱਚ ਮਦਦ ਕਰਨ ਲਈ ਆਪਣੀ ਪਹੁੰਚ ਨੂੰ ਨਿਰੰਤਰ ਵਿਕਸਤ ਕਰ ਰਹੇ ਹਾਂ, ਅਤੇ ਮਾਂ-ਪਿਓ ਨੂੰ ਆਪਣੇ ਬੱਚਿਆਂ ਦੀ ਸੁਰੱਖਿਆ ਬਾਰੇ ਨਿਸ਼ਚਿੰਤ ਮਹਿਸੂਸ ਕਰਵਾਉਣ ਲਈ ਸਭ ਤੋਂ ਵਧੀਆ ਸੰਭਵ ਖੋਜ ਅਤੇ ਮਾਹਰ ਸਲਾਹ ਨੂੰ ਸ਼ਾਮਲ ਕਰ ਰਹੇ ਹਾਂ। ਅਸੀਂ ਇੱਕ ਸੁਤੰਤਰ ਮਿਆਰ ਦੇ ਨਾਲ ਹੋਰ ਵੀ ਜ਼ਿਆਦਾ ਇਕਸਾਰ ਹੋਣਾ ਚਾਹੁੰਦੇ ਹਾਂ, ਜਿਸ ਬਾਰੇ ਪਰਿਵਾਰਾਂ ਨੂੰ ਪਹਿਲਾਂ ਤੋਂ ਹੀ ਪਤਾ ਹੋਵੇ, ਇਸ ਲਈ ਅਸੀਂ ਆਪਣੀਆਂ ਉਮਰ ਅਨੁਸਾਰ ਢੁਕਵੀਆਂ ਗਾਈਡਲਾਈਨਾਂ ਦੀ ਸਮੀਖਿਆ ਕੀਤੀ - ਉਹ ਗਾਈਡਲਾਈਨਾਂ ਜਿਹੜੀਆਂ ਇਹ ਨਿਰਧਾਰਤ ਕਰਦੀਆਂ ਹਨ ਕਿ 13+ ਉਮਰ ਲਈ ਫ਼ਿਲਮ ਰੇਟਿੰਗ ਮਾਪਦੰਡਾਂ ਅਤੇ ਮਾਂ-ਪਿਓ ਦੇ ਫ਼ੀਡਬੈਕ ਦੇ ਵਿਰੁੱਧ - ਅਸੀਂ ਅੱਲ੍ਹੜ ਬੱਚਿਆਂ ਤੋਂ ਕਿਹੜੀ ਸਮੱਗਰੀ ਲੁਕਾਉਂਦੇ ਹਾਂ ਅਤੇ ਉਨ੍ਹਾਂ ਨੂੰ ਕਿਹੜੀ ਸਮੱਗਰੀ ਦੀ ਸਿਫ਼ਾਰਸ਼ ਕਰਨ ਤੋਂ ਪਰਹੇਜ਼ ਕਰਦੇ ਹਾਂ। ਇਸਦਾ ਇਹ ਮਤਲਬ ਹੈ ਕਿ ਸਾਡਾ ਟੀਚਾ ਇਹ ਪੱਕਾ ਕਰਨਾ ਹੈ ਕਿ ਅੱਲ੍ਹੜ ਬੱਚਿਆਂ ਨੂੰ Instagram ਅਤੇ Facebook 'ਤੇ ਡਿਫ਼ੌਲਟ ਤੌਰ 'ਤੇ ਅਜਿਹੀ ਸਮੱਗਰੀ ਦੇਵੇ, ਜਿਵੇਂ ਉਹ ਉਨ੍ਹਾਂ ਨੂੰ ਉਮਰ-ਮੁਤਾਬਕ ਬਣੀ ਕਿਸੇ ਫ਼ਿਲਮ ਵਿੱਚ ਦੇਖਦੇ ਹਨ।
ਜਿਵੇਂ ਤੁਸੀਂ ਕਿਸੇ 13+ ਦੀ ਉਮਰ ਲਈ ਢੁਕਵੀਂ ਫ਼ਿਲਮ ਵਿੱਚ ਕੁਝ ਸੁਝਾਅ ਦੇਣ ਵਾਲੀ ਸਮੱਗਰੀ ਦੇਖ ਸਕਦੇ ਹੋ ਜਾਂ ਅਜਿਹੀ ਭਾਸ਼ਾ ਸੁਣ ਸਕਦੇ ਹੋ ਜੋ ਬੱਚਿਆਂ ਲਈ ਠੀਕ ਨਹੀਂ ਹੁੰਦੀ, ਉਸੇ ਤਰ੍ਹਾਂ ਅੱਲ੍ਹੜ ਬੱਚੇ ਕਈ ਵਾਰ Instagram ਜਾਂ Facebook 'ਤੇ ਅਜਿਹੀ ਕੁਝ ਸਮੱਗਰੀ ਦੇਖ ਸਕਦੇ ਹਨ - ਪਰ ਅਸੀਂ ਉਨ੍ਹਾਂ ਉਦਾਹਰਨਾਂ ਨੂੰ ਜਿੰਨਾ ਸੰਭਵ ਹੋ ਸਕੇ ਘੱਟ ਰੱਖਣ ਲਈ ਹਰ ਸੰਭਵ ਕੋਸ਼ਿਸ਼ ਕਰਦੇ ਰਹਾਂਗੇ। ਅਸੀਂ ਮੰਨਦੇ ਹਾਂ ਕਿ ਕੋਈ ਵੀ ਸਿਸਟਮ ਸੰਪੂਰਨ ਨਹੀਂ ਹੁੰਦਾ, ਅਤੇ ਅਸੀਂ ਸਮੇਂ ਦੇ ਨਾਲ ਸੁਧਾਰ ਕਰਨ ਲਈ ਵਚਨਬੱਧ ਹਾਂ।
ਸੋਸ਼ਲ ਮੀਡੀਆ ਅਤੇ ਫ਼ਿਲਮਾਂ ਵਿੱਚ ਬਹੁਤ ਅੰਤਰ ਹੁੰਦਾ ਹੈ। ਅਸੀਂ ਆਪਣੀਆਂ ਸਮੱਗਰੀ ਸੈਟਿੰਗਾਂ ਨੂੰ ਅੱਪਡੇਟ ਕਰਦੇ ਸਮੇਂ MPA ਨਾਲ ਕੰਮ ਨਹੀਂ ਕੀਤਾ, ਅਤੇ ਉਹ Instagram ਜਾਂ Facebook 'ਤੇ ਕਿਸੇ ਵੀ ਸਮੱਗਰੀ ਨੂੰ ਰੇਟਿੰਗ ਨਹੀਂ ਦੇ ਰਹੇ ਹਨ, ਅਤੇ ਉਹ ਕਿਸੇ ਵੀ ਤਰੀਕੇ ਨਾਲ ਸਾਡੀਆਂ ਸਮੱਗਰੀ ਸੈਟਿੰਗਾਂ ਦਾ ਸਮਰਥਨ ਜਾਂ ਮਨਜ਼ੂਰੀ ਨਹੀਂ ਦੇ ਰਹੇ ਹਨ। ਇਸ ਦੀ ਬਜਾਏ, ਅਸੀਂ ਮਾਂ-ਪਿਓ ਲਈ ਪਹਿਲਾਂ ਤੋਂ ਜਾਣੂ MPA ਦੀਆਂ ਗਾਈਡਲਾਈਨਾਂ ਤੋਂ ਪ੍ਰੇਰਣਾ ਲੈਂਦੇ ਹਾਂ, ਅਤੇ ਨਾਲ ਹੀ ਮਾਂ-ਪਿਓ ਤੋਂ ਫ਼ੀਡਬੈਕ ਵੀ ਲੈਂਦੇ ਹਾਂ। ਸਾਡੇ ਸਮੱਗਰੀ ਸੰਚਾਲਨ ਸਿਸਟਮ ਫ਼ਿਲਮ ਰੇਟਿੰਗ ਬੋਰਡ ਦੇ ਸਮਾਨ ਨਹੀਂ ਹਨ, ਇਸ ਲਈ ਹੋ ਸਕਦਾ ਹੈ ਕਿ ਅਨੁਭਵ ਬਿਲਕੁਲ ਇੱਕੋ ਜਿਹਾ ਨਾ ਹੋਵੇ।
ਸੁਰੱਖਿਆ ਦੀਆਂ ਕਈ ਪਰਤਾਂ
ਹਰ ਕਿਸੇ ਲਈ: ਅਸੀਂ ਉਸ ਸਮੱਗਰੀ ਨੂੰ ਹਟਾਉਂਦੇ ਹਾਂ ਜਿਹੜੀ ਸਾਡੀਆਂ ਭਾਈਚਾਰਕ ਮਿਆਰਾਂ ਦੀ ਉਲੰਘਣਾ ਕਰਦੀ ਹੈ। ਅਸੀਂ ਜਿਸ ਕਿਸਮ ਦੀ ਸਮੱਗਰੀ ਦੀ ਸਿਫ਼ਾਰਸ਼ ਕਰਦੇ ਹਾਂ, ਉਸ ਸਮੱਗਰੀ ਲਈ ਅਸੀਂ ਉੱਚ ਮਿਆਰਾਂ ਦੀ ਪਾਲਣਾ ਕਰਦੇ ਹਾਂ।
❌ ਸਾਡੇ ਵੱਲੋਂ ਹਟਾਈ ਜਾਣ ਵਾਲੀ ਸਮੱਗਰੀ
ਸਾਡੀਆਂ ਭਾਈਚਾਰਕ ਮਿਆਰਾਂ ਉਸ ਸਮੱਗਰੀ ਦੀਆਂ ਕਿਸਮਾਂ ਦੀ ਰੂਪਰੇਖਾ ਦਰਸਾਉਂਦੀਆਂ ਹਨ ਜਿਨ੍ਹਾਂ ਦੀ ਅਸੀਂ Facebook ਅਤੇ Instagram 'ਤੇ ਇਜਾਜ਼ਤ ਨਹੀਂ ਦਿੰਦੇ ਹਾਂ। ਜਦੋਂ ਵੀ ਸਾਨੂੰ ਅਜਿਹੀ ਸਮੱਗਰੀ ਦਾ ਪਤਾ ਚੱਲਦਾ ਹੈ ਤਾਂ - ਅਸੀਂ ਅੱਲੜ੍ਹ ਬੱਚਿਆਂ ਸਮੇਤ ਇਸ ਨੂੰ ਹਰ ਕਿਸੇ ਲਈ ਹਟਾ ਦਿੰਦੇ ਹਾਂ। ਜਦੋਂ ਅਸੀਂ ਅਜਿਹੀ ਸਮੱਗਰੀ ਨੂੰ ਹਟਾਉਂਦੇ ਹਾਂ ਜਿਹੜੀ ਨਿਯਮਾਂ ਨੂੰ ਤੋੜਦੀ ਹੈ, ਤਾਂ ਅਸੀਂ ਇਸ ਨੂੰ ਸਾਂਝਾ ਕਰਨ ਵਾਲੇ ਅਕਾਊਂਟ 'ਤੇ ਸਟ੍ਰਾਇਕ ਵੀ ਲਾਗੂ ਕਰ ਸਕਦੇ ਹਾਂ, ਅਤੇ ਅਸੀਂ ਉਨ੍ਹਾਂ ਅਕਾਊਂਟਾਂ ਨੂੰ ਅਸਮਰੱਥ ਕਰਦੇ ਹਾਂ ਜਿਹੜੇ ਵਾਰ-ਵਾਰ ਜਾਂ ਗੰਭੀਰ ਤਰੀਕੇ ਨਾਲ ਸਾਡੀਆਂ ਨੀਤੀਆਂ ਦੀ ਉਲੰਘਣਾ ਕਰਦੇ ਹਨ। ਇਹ ਨੀਤੀਆਂ ਅੱਲ੍ਹੜ ਬੱਚਿਆਂ ਸਮੇਤ ਸਾਡੇ ਭਾਈਚਾਰੇ ਵਿੱਚ ਹਰ ਕਿਸੇ ਨੂੰ ਸੁਰੱਖਿਅਤ ਰੱਖਣ ਲਈ ਤਿਆਰ ਕੀਤੀਆਂ ਗਈਆਂ ਹਨ।
ਸਮੱਗਰੀ ਦੀਆਂ ਉਹ ਕਿਸਮਾਂ ਜਿਨ੍ਹਾਂ ਨੂੰ ਅਸੀਂ ਪੂਰੀ ਤਰ੍ਹਾਂ ਹਟਾਉਂਦੇ ਹਾਂ, ਵਿੱਚ ਸ਼ਾਮਲ ਹਨ, ਪਰ ਇਨ੍ਹਾਂ ਤੱਕ ਸੀਮਿਤ ਨਹੀਂ ਹਨ:
ਅਸੀਂ ਅਜਿਹੀ ਸਮੱਗਰੀ ਦੀ ਇਜਾਜ਼ਤ ਨਹੀਂ ਦਿੰਦੇ ਜਿਹੜੀ ਲੋਕਾਂ ਨਾਲ ਦੁਰਵਿਵਹਾਰ ਜਾਂ ਸ਼ੋਸ਼ਣ ਕਰ ਸਕਦੀ ਹੈ, ਜਿਵੇਂ ਕਿ ਗੈਰ-ਸਹਿਮਤੀ ਵਾਲੀ ਜਿਨਸੀ ਗਤੀਵਿਧੀ ਨੂੰ ਉਤਸ਼ਾਹਿਤ ਕਰਨ ਵਾਲੀਆਂ ਪੋਸਟਾਂ, ਜਾਂ ਬਾਲ ਸ਼ੋਸ਼ਣ ਕਰਨ ਵਾਲੀ ਸਮੱਗਰੀ ਨੂੰ ਸਾਂਝਾ ਕਰਨਾ ਜਾਂ ਮੰਗਣਾ। ਉਦਾਹਰਨ ਲਈ, ਅਸੀਂ ਅਜਿਹੀ ਸਮੱਗਰੀ ਨੂੰ ਹਟਾ ਦਿਆਂਗੇ ਜਿਹੜੀ:
❌ ਵੈਸ਼ਯਾਵ੍ਰਿਤੀ ਦੀ ਪੇਸ਼ਕਸ਼ ਕਰਨ ਵਾਲੀ ਪੋਸਟ ਜਾਂ ਕਿਸੇ ਨੂੰ ਪੋਰਨੋਗ੍ਰਾਫੀ ਭੇਜਣ ਲਈ ਕਹਿਣਾ।
❌ ਕਿਸੇ ਜਿਨਸੀ ਜਾਂ ਸੰਭੋਗ ਦੀ ਕਿਰਿਆ ਵਿੱਚ ਕਿਸੇ ਦੀ ਫ਼ੋਟੋ, ਜਿਹੜੀ ਉਨ੍ਹਾਂ ਦੀ ਸਹਿਮਤੀ ਤੋਂ ਬਿਨਾਂ ਸਾਂਝੀ ਕੀਤੀ ਜਾਂਦੀ ਹੈ।
❌ ਬਾਲ ਜਿਨਸੀ ਸ਼ੋਸ਼ਣ ਸਮੱਗਰੀ ਜਾਂ ਨੰਗੇ ਬੱਚਿਆਂ ਦੀ ਫ਼ੋਟੋਆਂ ਦੀ ਪੇਸ਼ਕਸ਼ ਕਰਨ ਜਾਂ ਮੰਗ ਕਰਨ ਵਾਲੀ ਪੋਸਟ।
ਅਸੀਂ ਲੋਕਾਂ ਨੂੰ ਆਪਣੇ ਅਨੁਭਵਾਂ ਬਾਰੇ ਗੱਲ ਕਰਨ ਅਤੇ ਸਹਾਇਤਾ ਲੈਣ ਲਈ ਥਾਂ ਦਿੰਦੇ ਹੋਏ ਅਜਿਹੀ ਸਮੱਗਰੀ ਦੀ ਇਜਾਜ਼ਤ ਨਹੀਂ ਦਿੰਦੇ ਜੋ ਖੁਦਕੁਸ਼ੀ, ਸਵੈ-ਸੱਟ ਜਾਂ ਖਾਣ ਸੰਬੰਧੀ ਵਿਕਾਰਾਂ ਨੂੰ ਉਤਸ਼ਾਹਿਤ ਕਰਦੀ ਹੈ, ਸ਼ਲਾਘਾ ਕਰਦੀ ਹੈ ਜਾਂ ਪ੍ਰਚਾਰ ਕਰਦੀ ਹੈ। ਉਦਾਹਰਨ ਲਈ, ਅਸੀਂ ਅਜਿਹੀ ਸਮੱਗਰੀ ਨੂੰ ਹਟਾ ਦਿਆਂਗੇ ਜਿਹੜੀ:
❌ ਖੁਦਕੁਸ਼ੀ, ਸਵੈ-ਸੱਟ, ਜਾਂ ਖਾਣ-ਪੀਣ ਸੰਬੰਧੀ ਵਿਕਾਰਾਂ ਬਾਰੇ ਸਕਾਰਾਤਮਕ ਬੋਲਣ ਵਾਲੀ ਪੋਸਟ।
❌ ਅਜਿਹੀ ਸਟੋਰੀ ਜਿਹੜੀ ਖੁਦ ਨੂੰ ਸੱਟ ਮਾਰਨ ਦੇ ਚਿਤਰਨ ਨੂੰ ਦਰਸਾਉਂਦੀ ਹੈ।
❌ ਖਾਣ-ਪੀਣ ਸੰਬੰਧੀ ਵਿਕਾਰਾਂ ਕਰਕੇ ਕਿਸੇ ਦਾ ਮਜ਼ਾਕ ਉਡਾਉਣ ਵਾਲਾ ਕਮੈਂਟ।
ਅਸੀਂ ਅਜਿਹੀ ਸਮੱਗਰੀ ਦੀ ਇਜਾਜ਼ਤ ਨਹੀਂ ਦਿੰਦੇ ਜਿਹੜੀ ਡਰਾਉਣ-ਧਮਕਾਉਣ ਜਾਂ ਬਾਹਰ ਕੱਢਣ ਦਾ ਮਾਹੌਲ ਪੈਦਾ ਕਰ ਸਕਦੀ ਹੈ, ਜਿਸ ਵਿੱਚ ਧੱਕੇਸ਼ਾਹੀ ਅਤੇ ਉਤਪੀੜਨ ਸ਼ਾਮਲ ਹੈ। ਉਦਾਹਰਨ ਲਈ, ਅਸੀਂ ਅਜਿਹੀ ਸਮੱਗਰੀ ਨੂੰ ਹਟਾ ਦਿਆਂਗੇ ਜਿਹੜੀ:
❌ ਲੋਕਾਂ ਵਿਰੁੱਧ ਉਨ੍ਹਾਂ ਦੀ ਨਸਲ, ਧਰਮ, ਜਾਤੀ, ਲਿੰਗ ਪਛਾਣ, ਜਾਂ ਜਿਨਸੀ ਰੁਝਾਨ ਦੇ ਅਧਾਰ 'ਤੇ ਅਣਮਨੁੱਖੀ ਭਾਸ਼ਾ ਦੀ ਵਰਤੋਂ ਕਰਨ ਵਾਲੀ ਪੋਸਟ।
❌ ਜਿਨਸੀ ਸ਼ੋਸ਼ਣ ਦੇ ਸ਼ਿਕਾਰ ਵਿਅਕਤੀ ਦਾ ਮਜਾਕ ਉਡਾਉਣ ਵਾਲਾ ਕਮੈਂਟ।
❌ ਅਜਿਹੀ ਪੋਸਟ ਜਿਹੜੀ ਵਿਅਕਤੀਗਤ ਤੌਰ 'ਤੇ ਪਛਾਣਯੋਗ ਜਾਣਕਾਰੀ (ਜਿਵੇਂ ਕਿ ਪਾਸਪੋਰਟ ਨੰਬਰ) ਜਾਰੀ ਕਰਨ ਦੀ ਧਮਕੀ ਦਿੰਦੀ ਹੈ ਜਾਂ ਕਿਸੇ ਵਿਅਕਤੀ ਨੂੰ ਪਰੇਸ਼ਾਨ ਕਰਨ ਲਈ ਹੋਰਾਂ ਨੂੰ ਉਕਸਾਉਂਦੀ ਹੈ।
ਅਸੀਂ ਆਪਣੇ ਪਲੇਟਫ਼ਾਰਮਾਂ 'ਤੇ ਕੁਝ ਪ੍ਰਤੀਬੰਧਿਤ ਚੀਜ਼ਾਂ ਅਤੇ ਸੇਵਾਵਾਂ ਨੂੰ ਖਰੀਦਣ, ਵੇਚਣ ਜਾਂ ਉਨ੍ਹਾਂ ਦਾ ਵਪਾਰ ਕਰਨ ਦੀ ਇਜਾਜ਼ਤ ਨਹੀਂ ਦਿੰਦੇ ਹਾਂ। ਅਸੀਂ ਲੋਕਾਂ ਨੂੰ ਕੁਝ ਕਿਸਮਾਂ ਦੇ ਪਦਾਰਥਾਂ ਦਾ ਪ੍ਰਚਾਰ ਕਰਨ ਜਾਂ ਉਨ੍ਹਾਂ ਦੀ ਵਰਤੋਂ ਕਿਵੇਂ ਕਰਨੀ ਹੈ ਇਸ ਬਾਰੇ ਨਿਰਦੇਸ਼ ਦੇਣ ਦੀ ਇਜਾਜ਼ਤ ਨਹੀਂ ਦਿੰਦੇ ਹਾਂ। ਉਦਾਹਰਨ ਲਈ, ਅਸੀਂ ਅਜਿਹੀ ਸਮੱਗਰੀ ਨੂੰ ਹਟਾ ਦਿਆਂਗੇ ਜਿਹੜੀ:
❌ ਵੱਖ-ਵੱਖ ਕਿਸਮਾਂ ਦੀਆਂ ਨਸ਼ੀਲੀਆਂ ਦਵਾਈਆਂ ਖਰੀਦਣ, ਵੇਚਣ ਜਾਂ ਉਨ੍ਹਾਂ ਦਾ ਵਪਾਰ ਕਰਨ ਦੀ ਪੇਸ਼ਕਸ਼ ਦੇਣ ਵਾਲੀ ਸਟੋਰੀ।
❌ ਤੰਬਾਕੂ, ਨਿਕੋਟੀਨ, ਜਾਂ ਅਲਕੋਹਲ ਖਰੀਦਣ, ਵੇਚਣ ਜਾਂ ਇਨ੍ਹਾਂ ਦਾ ਵਪਾਰ ਕਰਨ ਦੀ ਕੋਸ਼ਿਸ਼ ਕਰਨ ਵਾਲੀ ਪੋਸਟ
❌ ਬੰਦੂਕ ਦੇ ਹਿੱਸਿਆਂ ਦੇ 3D ਪ੍ਰਿੰਟ ਦੀ ਪੇਸ਼ਕਸ਼ ਕਰਨ ਵਾਲਾ ਕਮੈਂਟ।
ਅਸੀਂ ਵੈਧ ਵਪਾਰਾਂ ਲਈ ਕੁਝ ਅਪਵਾਦ ਰੱਖਦੇ ਹਾਂ ਜਿਹੜੇ ਕਨੂੰਨੀ ਤੌਰ 'ਤੇ ਕੁਝ ਕਿਸਮਾਂ ਦੀਆਂ ਪਾਬੰਦੀਸ਼ੁਦਾ ਚੀਜ਼ਾਂ ਦੀ ਪੇਸ਼ਕਸ਼ ਕਰਦੇ ਹਨ।
ਅਸੀਂ ਸੀਮਾ ਤੋਂ ਪਰੇ ਇਤਰਾਜ਼ਯੋਗ ਸਮੱਗਰੀ, ਜਾਂ ਅਜਿਹੀ ਸਮੱਗਰੀ ਦੀ ਇਜਾਜ਼ਤ ਨਹੀਂ ਦਿੰਦੇ ਹਾਂ ਜਿਹੜੀ ਨਿੱਜੀ ਸੁਰੱਖਿਆ ਲਈ ਖਤਰਾ ਪੈਦਾ ਕਰ ਸਕਦੀ ਹੈ, ਜਿਵੇਂ ਕਿ ਲੋਕਾਂ ਵਿਰੁੱਧ ਹਿੰਸਾ ਦੀਆਂ ਧਮਕੀਆਂ ਦੇਣਾ। ਉਦਾਹਰਨ ਲਈ, ਅਸੀਂ ਅਜਿਹੀ ਸਮੱਗਰੀ ਨੂੰ ਹਟਾ ਦਿਆਂਗੇ ਜਿਹੜੀ:
❌ ਕਿਸੇ ਵਿਅਕਤੀ ਨੂੰ ਮਾਰਨ ਜਾਂ ਅਗਵਾ ਕਰਨ ਦੀ ਧਮਕੀ ਦੇਣ ਵਾਲੀ ਪੋਸਟ, ਜਾਂ ਦੂਜਿਆਂ ਨੂੰ ਹਿੰਸਾ ਕਰਨ ਲਈ ਉਤਸ਼ਾਹਿਤ ਕਰਨ ਵਾਲੀ ਪੋਸਟ।
❌ ਇੱਕ ਅਜਿਹੀ ਗ੍ਰਾਫਿਕ ਵੀਡੀਓ ਜਿਸ ਵਿੱਚ ਕਿਸੇ ਵਿਅਕਤੀ ਨੂੰ ਕੱਟਦੇ-ਵੱਢਦੇ ਜਾਂ ਬੁਰੀ ਤਰ੍ਹਾਂ ਸਾੜ੍ਹਦੇ ਹੋਏ ਦਿਖਾਇਆ ਗਿਆ ਹੈ।
ਅਸੀਂ ਡਾਕਟਰੀ ਪ੍ਰਸੰਗਾਂ ਜਾਂ ਜਾਗਰੂਕਤਾ ਵਧਾਉਣ ਲਈ ਸਾਂਝਾ ਕੀਤੇ ਜਾਣ ਪਿੱਛੇ ਇਤਰਾਜ਼ਯੋਗ ਸਮੱਗਰੀ ਲਈ ਕੁਝ ਅਪਵਾਦ ਕਰਦੇ ਹਾਂ। ਜਿੱਥੇ ਅਸੀਂ ਇਤਰਾਜ਼ਯੋਗ ਸਮੱਗਰੀ ਦੀ ਇਜਾਜ਼ਤ ਦਿੰਦੇ ਹਾਂ, ਅਸੀਂ ਆਮ ਤੌਰ 'ਤੇ ਇਸ ਨੂੰ ਚਿਤਾਵਨੀ ਸਕ੍ਰੀਨ ਨਾਲ ਕਵਰ ਕਰਦੇ ਹਾਂ ਤਾਂ ਜੋ ਲੋਕਾਂ ਨੂੰ ਸਮੱਗਰੀ 'ਤੇ ਕਲਿੱਕ ਕਰਨ ਤੋਂ ਪਹਿਲਾਂ ਦੱਸਿਆ ਜਾ ਸਕੇ ਕਿ ਇਹ ਸੰਵੇਦਨਸ਼ੀਲ ਹੋ ਸਕਦੀ ਹੈ।
ਅਸੀਂ ਨੰਗੇਜ਼ ਜਾਂ ਜਿਨਸੀ ਗਤੀਵਿਧੀ ਦੇ ਨਾਲ-ਨਾਲ ਸਪਸ਼ਟ ਜਿਨਸੀ ਭਾਸ਼ਾ ਦੇ ਪ੍ਰਦਰਸ਼ਨ 'ਤੇ ਪਾਬੰਦੀ ਲਗਾਉਂਦੇ ਹਾਂ। ਉਦਾਹਰਨ ਲਈ, ਅਸੀਂ ਅਜਿਹੀ ਸਮੱਗਰੀ ਨੂੰ ਹਟਾ ਦਿਆਂਗੇ ਜਿਹੜੀ:
❌ ਅਜਿਹੀ ਤਸਵੀਰ ਜਾਂ ਵੀਡੀਓ ਜਿਸ ਵਿੱਚ ਨੰਗੇਜ਼ ਜਾਂ ਸਪਸ਼ਟ ਜਿਨਸੀ ਗਤੀਵਿਧੀ ਸ਼ਾਮਲ ਹੈ, ਜਿਸ ਵਿੱਚ AI ਵੱਲੋਂ ਤਿਆਰ ਕੀਤੇ ਗਏ ਚਿੱਤਰ ਵੀ ਸ਼ਾਮਲ ਹਨ।
❌ ਜਿਨਸੀ ਮੁਲਾਕਾਤਾਂ ਦੇ ਸਪਸ਼ਟ ਜਾਂ ਗ੍ਰਾਫਿਕ ਵਰਣਨ ਵਾਲੀ ਸਟੋਰੀ (ਜਦੋਂ ਤੱਕ ਇਹ ਮਜ਼ਾਕ ਜਾਂ ਵਿਅੰਗਾਤਮਕ ਨਾ ਹੋਵੇ)।
ਅਸੀਂ ਸਮਝਦੇ ਹਾਂ ਕਿ ਨੰਗੇਜ਼ ਨੂੰ ਕਈ ਕਾਰਨਾਂ ਕਰਕੇ ਸਾਂਝਾ ਕੀਤਾ ਜਾ ਸਕਦਾ ਹੈ, ਜਿਵੇਂ ਕਿ ਇੱਕ ਰੋਸ ਪ੍ਰਦਰਸ਼ਨ ਵਜੋਂ, ਕਿਸੇ ਉਦੇਸ਼ ਬਾਰੇ ਜਾਗਰੂਕਤਾ ਪੈਦਾ ਕਰਨ ਲਈ ਜਾਂ ਵਿਦਿਅਕ ਜਾਂ ਡਾਕਟਰੀ ਕਾਰਨਾਂ ਲਈ। ਜਿੱਥੇ ਢੁੱਕਵਾਂ ਹੋਵੇ ਅਤੇ ਅਜਿਹਾ ਇਰਾਦਾ ਸਪਸ਼ਟ ਹੋਵੇ, ਅਸੀਂ ਇਸ ਸਮੱਗਰੀ ਲਈ ਇਜਾਜ਼ਤ ਦਿੰਦੇ ਹਾਂ।
ਸਾਡੇ ਵੱਲੋਂ ਹਟਾਈ ਜਾਣ ਵਾਲੀ ਸਮੱਗਰੀ ਦੇ ਪੂਰੇ ਵੇਰਵਿਆਂ ਲਈ, ਸਾਡੀਆਂ ਭਾਈਚਾਰਕ ਮਿਆਰਾਂ ਦੇਖੋ।
🛡️ ਅਜਿਹੀ ਸਮੱਗਰੀ ਜਿਸ ਦੀ ਸਿਫ਼ਾਰਸ਼ ਕਰਨ ਤੋਂ ਅਸੀਂ ਪਰਹੇਜ਼ ਕਰਦੇ ਹਾਂ
ਅਸੀਂ Instagram Reels ਜਾਂ Explore ਜਾਂ Facebook ਫ਼ੀਡ ਵਰਗੀਆਂ ਥਾਵਾਂ 'ਤੇ ਸਿਫ਼ਾਰਸ਼ਾਂ ਕਰਦੇ ਹਾਂ ਤਾਂ ਜੋ ਲੋਕਾਂ ਨੂੰ ਉਨ੍ਹਾਂ ਦੀ ਦਿਲਚਸਪੀ ਵਾਲੀ ਨਵੀਂ ਸਮੱਗਰੀ ਲੱਭਣ ਵਿੱਚ ਮਦਦ ਕੀਤੀ ਜਾ ਸਕੇ। ਸਾਡੇ ਕੋਲ ਉਸ ਕਿਸਮ ਦੀ ਸਮੱਗਰੀ ਬਾਰੇ ਗਾਈਡਲਾਈਨਾਂ ਹਨ ਜਿਸ ਦੀ ਸਿਫ਼ਾਰਸ਼ ਕੀਤੀ ਜਾ ਸਕਦੀ ਹੈ, ਅਤੇ ਅਜਿਹੀਆਂ ਸਿਫ਼ਾਰਸ਼ਾਂ ਕਰਨ ਤੋਂ ਪਰਹੇਜ਼ ਕਰੋ ਜਿਹੜੀਆਂ ਘੱਟ ਗੁਣਵੱਤਾ, ਇਤਰਾਜ਼ਯੋਗ, ਜਾਂ ਵਿਸ਼ੇਸ਼ ਤੌਰ 'ਤੇ ਸੰਵੇਦਨਸ਼ੀਲ ਹੋ ਸਕਦੀਆਂ ਹਨ—ਫਿਰ ਚਾਹੇ ਸਮੱਗਰੀ ਇਸ ਹੱਦ ਤੱਕ ਗੰਭੀਰ ਨਾ ਹੋਵੇ ਕਿ ਇਸ ਨੂੰ ਹਟਾਇਆ ਜਾ ਸਕੇ। ਅਜਿਹਾ ਇਸ ਲਈ ਕਿਉਂਕਿ ਸਾਨੂੰ ਲੱਗਦਾ ਹੈ ਕਿ ਲੋਕਾਂ ਨੂੰ ਅਜਿਹੇ ਅਕਾਊਂਟਾਂ ਤੋਂ ਸਮੱਗਰੀ ਦਿਖਾਉਂਦੇ ਸਮੇਂ ਸਖਤ ਮਾਪਦੰਡ ਹੋਣੇ ਚਾਹੀਦੇ ਹਨ ਜਿਨ੍ਹਾਂ ਨੂੰ ਉਨ੍ਹਾਂ ਨੇ ਫਾਲੋ ਕਰਨ ਦੀ ਚੋਣ ਨਹੀਂ ਕੀਤੀ ਹੈ।
⚠️ ਅਤਿਰਿਕਤ ਸਮੱਗਰੀ ਜਿਹੜੀ ਅਸੀਂ ਅੱਲ੍ਹੜ ਬੱਚਿਆਂਤੋਂ ਲੁਕਾਉਂਦੇ ਹਾਂ
ਅੱਲ੍ਹੜ: ਅਸੀਂ 18 ਸਾਲ ਤੋਂ ਘੱਟ ਉਮਰ ਦੇ ਅੱਲ੍ਹੜ ਬੱਚਿਆਂ ਲਈ ਵਾਧੂ ਸੁਰੱਖਿਆ ਪ੍ਰਦਾਨ ਕਰਦੇ ਹਾਂ। ਅਸੀਂ ਸਾਰਿਆਂ ਲਈ ਹਟਾਈ ਜਾਣ ਵਾਲੀ ਸਮੱਗਰੀ ਤੋਂ ਇਲਾਵਾ ਹੋਰ ਸਮੱਗਰੀ ਵੀ ਲੁਕਾਉਂਦੇ ਹਾਂ, ਅਤੇ ਅੱਲ੍ਹੜ ਬੱਚਿਆਂ ਨੂੰ ਉਸ ਸਮੱਗਰੀ ਦੀ ਸਿਫ਼ਾਰਸ਼ ਕਰਨ ਤੋਂ ਵੀ ਪਰਹੇਜ਼ ਕਰਦੇ ਹਾਂ ਜੋ ਬਾਲਗਾਂ ਲਈ ਸਿਫ਼ਾਰਸ਼ ਕਰਨਯੋਗ ਹੈ। ਸਾਡਾ ਟੀਚਾ ਇਹ ਪੱਕਾ ਕਰਨਾ ਹੈ ਕਿ ਅੱਲ੍ਹੜ ਬੱਚਿਆਂ ਨੂੰ Instagram ਅਤੇ Facebook 'ਤੇ ਡਿਫ਼ੌਲਟ ਤੌਰ 'ਤੇ ਅਜਿਹੀ ਸਮੱਗਰੀ ਦੇਵੇ, ਜਿਵੇਂ ਉਹ ਉਨ੍ਹਾਂ ਨੂੰ ਉਮਰ-ਮੁਤਾਬਕ ਬਣੀ ਕਿਸੇ ਫ਼ਿਲਮ ਵਿੱਚ ਦੇਖਦੇ ਹਨ। ਅੱਲ੍ਹੜ ਬੱਚੇ ਸਿਰਫ਼ ਮਾਂ-ਪਿਓ ਦੀ ਇਜਾਜ਼ਤ ਨਾਲ ਇੱਕ ਤੀਜੀ, ਵਧੇਰੇ ਅਨੁਕੂਲਿਤ ਸੈਟਿੰਗ - ਜਿਸਨੂੰ ਹੋਰ ਸਮੱਗਰੀ ਕਿਹਾ ਜਾਂਦਾ ਹੈ - ਨੂੰ ਐਕਸੈਸ ਕਰ ਸਕਦੇ ਹਨ। Instagram 'ਤੇ, ਅੱਲ੍ਹੜ ਬੱਚੇ ਜਾਂ ਉਨ੍ਹਾਂ ਦੇ ਮਾਂ-ਪਿਓ “ਸੀਮਿਤ ਸਮੱਗਰੀ” ਨਾਮਕ ਹੋਰ ਵੱਧ ਪਾਬੰਦੀਸ਼ੁਦਾ ਸੈਟਿੰਗ ਨੂੰ ਵੀ ਚੁਣ ਸਕਦੇ ਹਨ।
13+ (ਡਿਫ਼ੌਲਟ): 13+ ਸਮੱਗਰੀ ਸੈਟਿੰਗ ਉਮਰ 13+ ਲਈ ਫ਼ਿਲਮ ਰੇਟਿੰਗ ਮਾਪਦੰਡਾਂ ਅਤੇ ਮਾਂ-ਪਿਓ ਦੇ ਫ਼ੀਡਬੈਕ ਵੱਲੋਂ ਨਿਰਦੇਸ਼ਿਤ ਹੁੰਦੀ ਹੈ, ਅਤੇ ਡਿਫ਼ੌਲਟ ਤੌਰ 'ਤੇ ਅੱਲ੍ਹੜ ਬੱਚਿਆਂ ਲਈ ਚਾਲੂ ਹੁੰਦੀ ਹੈ। ਅਸੀਂ ਇਹ ਬਿਹਤਰ ਤਰੀਕੇ ਨਾਲ ਸਮਝਣ ਲਈ ਦੁਨੀਆ ਭਰ ਦੇ ਨੌਜਵਾਨ ਮਾਹਰਾਂ ਨਾਲ ਕੰਮ ਕੀਤਾ ਹੈ ਕਿ ਕਿਸ ਕਿਸਮ ਦੀ ਸਮੱਗਰੀ ਬਾਲਗਾਂ ਲਈ ਤਾਂ ਢੁੱਕਵੀਂ ਹੋ ਸਕਦੀ ਹੈ, ਪਰ ਓਹੀ ਸਮੱਗਰੀ 18 ਸਾਲ ਤੋਂ ਘੱਟ ਉਮਰ ਦੇ ਅੱਲ੍ਹੜ ਬੱਚਿਆਂ ਲਈ ਬਹੁਤ ਵਿਅਸਕ ਹੋ ਸਕਦੀ ਹੈ, ਅਤੇ ਅਸੀਂ ਉਮਰ 13+ ਲਈ ਫ਼ਿਲਮ ਰੇਟਿੰਗ ਮਾਪਦੰਡਾਂ ਅਤੇ ਮਾਂ-ਪਿਓ ਦੇ ਫ਼ੀਡਬੈਕ ਦੇ ਆਧਾਰ 'ਤੇ ਇਨ੍ਹਾਂ ਅੱਲ੍ਹੜ ਬੱਚਿਆਂ ਦੀ ਉਮਰ ਅਨੁਸਾਰ ਢੁਕਵੀਆਂ ਗਾਈਡਲਾਈਨਾਂ ਦੀ ਸਮੀਖਿਆ ਕੀਤੀ ਹੈ। ਇਸ ਸੈਟਿੰਗ ਵਿੱਚ, ਅਸੀਂ ਅੱਲ੍ਹੜ ਬੱਚਿਆਂ ਤੋਂ ਅਜਿਹੀ ਵਧੀਕ ਸਮੱਗਰੀ ਲੁਕਾਵਾਂਗੇ ਜਿਨ੍ਹਾਂ ਨੂੰ ਅਸੀਂ ਪਹਿਲਾਂ ਹੀ ਸਾਰਿਆਂ ਲਈ ਹਟਾਉਂਦੇ ਹਾਂ। Facebook 'ਤੇ, 13+ ਸੈਟਿੰਗ ਅਤੇ ਇਸ ਨਾਲ ਸੰਬੰਧਿਤ ਸੁਰੱਖਿਆਵਾਂ ਨੂੰ ਪੜਾਵਾਂ ਵਿੱਚ ਲਾਗੂ ਕੀਤਾ ਜਾ ਰਿਹਾ ਹੈ। 13+ ਸਮੱਗਰੀ ਸੈਟਿੰਗ ਅੱਲ੍ਹੜ ਬੱਚਿਆਂ ਦੀਆਂ ਉਨ੍ਹਾਂ ਪ੍ਰੋਫ਼ਾਈਲਾਂ ਅਤੇ ਪੇਜਾਂ ਨਾਲ ਇੰਟਰੈਕਸ਼ਨਾਂ ਨੂੰ ਸੀਮਿਤ ਕਰੇਗੀ ਜੋ ਮੁੱਖ ਤੌਰ 'ਤੇ ਅਜਿਹੀ ਸਮੱਗਰੀ ਸਾਂਝੀ ਕਰਦੇ ਹਨ ਜੋ ਉਮਰ-ਅਨੁਕੂਲ ਨਹੀਂ ਹੈ। ਇਸਦਾ ਮਤਲਬ ਹੈ, ਬਾਲਗਾਂ ਕੋਲ ਅਜੇ ਵੀ ਇਸ ਸਮੱਗਰੀ ਦੀ ਐਕਸੈਸ ਹੋਵੇਗੀ, ਅੱਲ੍ਹੜ ਬੱਚੇ ਇਸ ਨੂੰ ਦੇਖਣ ਜਾਂ ਇਸ ਨਾਲ ਇੰਟਰੈਕਟ ਕਰਨ ਦੇ ਯੋਗ ਨਹੀਂ ਹੋਣਗੇ, ਭਾਵੇਂ ਇਹ ਅਜਿਹੇ ਅਕਾਊਂਟ ਵੱਲੋਂ ਉਨ੍ਹਾਂ ਦੀ ਫ਼ੀਡ ਜਾਂ ਸਟੋਰੀਜ਼ ਵਿੱਚ ਸਾਂਝੀ ਕੀਤੀ ਗਈ ਹੋਵੇ ਜਿਸ ਨੂੰ ਉਹ ਫਾਲੋ ਕਰਦੇ ਹਨ। ਅਸੀਂ ਅੱਲ੍ਹੜ ਬੱਚਿਆਂ ਨੂੰ ਉਨ੍ਹਾਂ ਅਕਾਊਂਟਾਂ ਦੀ ਖੋਜ ਕਰਨ, ਫਾਲੋ ਕਰਨ ਅਤੇ ਉਨ੍ਹਾਂ ਨਾਲ ਇੰਟਰੈਕਟ ਕਰਨ ਤੋਂ ਵੀ ਰੋਕਾਂਗੇ ਜਿਹੜੇ ਮੁੱਖ ਤੌਰ 'ਤੇ ਉਮਰ-ਮੁਤਾਬਕ ਅਢੁਕਵੀਂ ਸਮੱਗਰੀ ਸਾਂਝੀ ਕਰਦੇ ਹਨ।
ਇਸ ਡਿਫ਼ੌਲਟ ਸੈਟਿੰਗ ਵਿੱਚ ਉਸ ਸਮੱਗਰੀ ਦੀਆਂ ਕੁਝ ਕਿਸਮਾਂ ਨੂੰ ਦੇਖਣ ਲਈ ਇੱਥੇ ਕਲਿੱਕ ਕਰੋ ਜਿਨ੍ਹਾਂ ਨੂੰ ਅਸੀਂ ਅੱਲ੍ਹੜ ਬੱਚਿਆਂ ਤੋਂ ਲੁਕਾਵਾਂਗੇ।
ਅਸੀਂ ਅੱਲ੍ਹੜ ਬੱਚਿਆਂ ਨੂੰ ਸੰਭਾਵਿਤ ਤੌਰ 'ਤੇ ਪਰੇਸ਼ਾਨ ਕਰਨ ਵਾਲੀ ਜਾਂ ਸੰਵੇਦਨਸ਼ੀਲ ਸਮੱਗਰੀ ਤੋਂ ਬਚਾਉਣ ਲਈ ਖੁਦਕੁਸ਼ੀ ਅਤੇ ਸਵੈ-ਨੁਕਸਾਨ ਨਾਲ ਸੰਬੰਧਿਤ ਕੁਝ ਖ਼ਾਸ ਸਮੱਗਰੀ ਨੂੰ ਲੁਕਾਉਂਦੇ ਹਾਂ। ਉਦਾਹਰਨ ਲਈ, ਅਸੀਂ ਅਜਿਹੀ ਸਮੱਗਰੀ 'ਤੇ ਉਮਰ ਅਨੁਸਾਰ ਪ੍ਰਤੀਬੰਧ ਲਗਾਵਾਂਗੇ:
⚠️ ਅਜਿਹੀ ਪੋਸਟ ਜਿੱਥੇ ਕੋਈ ਵਿਅਕਤੀ ਖੁਦਕੁਸ਼ੀ, ਸਵੈ-ਸੱਟ ਜਾਂ ਖਾਣ-ਪੀਣ ਸੰਬੰਧੀ ਵਿਕਾਰਾਂ ਬਾਰੇ ਆਪਣੇ ਨਿੱਜੀ ਅਨੁਭਵਾਂ ਦਾ ਵਰਣਨ ਕਰ ਰਿਹਾ ਹੈ, ਸਿਵਾਏ ਰਿਕਵਰੀ ਦੇ ਸੰਦਰਭ ਵਿੱਚ।
⚠️ ਅਜਿਹੀ ਫ਼ੋਟੋ ਜਾਂ ਵੀਡੀਓ ਜਿਸ ਵਿੱਚ ਹਸਪਤਾਲ ਵਿੱਚ ਲੋਕ ਇੱਛਿਤ-ਮੌਤ ਵਿੱਚ ਸ਼ਾਮਲ ਹਨ ਜਾਂ ਸਹਾਇਤਾ ਪ੍ਰਾਪਤ ਖੁਦਕੁਸ਼ੀ ਕਰ ਰਹੇ ਹਨ।
⚠️ ਇੱਕ ਅਜਿਹੀ ਸਟੋਰੀ ਜਿੱਥੇ ਕੋਈ ਆਪਣਾ ਬਹੁਤ ਜ਼ਿਆਦਾ ਭਾਰ ਘਟਾਉਣ ਦੇ ਵਿਹਾਰ ਬਾਰੇ ਗੱਲ ਕਰ ਰਿਹਾ ਹੈ।
ਅਸੀਂ ਅੱਲ੍ਹੜ ਬੱਚਿਆਂ ਤੋਂ ਅਜਿਹੀ ਸਮੱਗਰੀ ਲੁਕਾਉਂਦੇ ਹਾਂ ਜਿਹੜੀ ਉਨ੍ਹਾਂ ਨੂੰ ਸੰਭਾਵਿਤ ਤੌਰ 'ਤੇ ਨੁਕਸਾਨਦੇਹ ਗਤੀਵਿਧੀਆਂ ਵਿੱਚ ਸ਼ਾਮਲ ਹੋਣ ਲਈ ਪ੍ਰਭਾਵਿਤ ਕਰ ਸਕਦੀ ਹੈ। ਉਦਾਹਰਨ ਲਈ, ਅਸੀਂ ਅਜਿਹੀ ਸਮੱਗਰੀ 'ਤੇ ਉਮਰ ਅਨੁਸਾਰ ਪ੍ਰਤੀਬੰਧ ਲਗਾਵਾਂਗੇ:
⚠️ ਤੰਬਾਕੂ, ਨਿਕੋਟੀਨ ਉਤਪਾਦਾਂ, ਅਲਕੋਹਲ, ਜਾਂ ਹਥਿਆਰਾਂ ਨੂੰ ਵੇਚਣ ਦੀ ਪੇਸ਼ਕਸ਼ ਕਰਨ ਵਾਲੀ ਅਜਿਹੀ ਪੋਸਟ ਜਿਸਨੂੰ ਕਿਸੇ ਵੈਧ ਰਿਵਾਇਤੀ ਵਪਾਰ ਵੱਲੋਂ ਸਾਂਝਾ ਕੀਤਾ ਜਾਂਦਾ ਹੈ।
⚠️ ਅਜਿਹੀ ਸਟੋਰੀ ਜਿਹੜੀ ਲੋਕਾਂ ਨੂੰ ਸਾਈਕੇਡੇਲਿਕ ਦਵਾਈਆਂ (ਜਿਨ੍ਹਾਂ ਨੂੰ ਐਂਥੀਅਜਨਜ਼ ਵੀ ਕਿਹਾ ਜਾਂਦਾ ਹੈ) ਜਾਂ ਭੰਗ ਦੇ ਉਤਪਾਦਾਂ ਦਾ ਸੇਵਨ ਕਰਨ ਲਈ ਉਤਸ਼ਾਹਿਤ ਕਰਦੀ ਹੈ।
⚠️ ਨਸ਼ੇ ਸੰਬੰਧੀ ਪੀਣ ਵਾਲੇ ਪਦਾਰਥਾਂ ਦੀਆਂ ਪਕਵਾਨਾਂ ਵਾਲੀਆਂ ਤਸਵੀਰਾਂ।
⚠️ ਭਾਰ ਘਟਾਉਣ ਵਾਲੇ ਉਤਪਾਦਾਂ ਜਾਂ ਸੇਵਾਵਾਂ ਦੀ ਵਿਕਰੀ ਵਾਲੀ ਇੱਕ ਪੋਸਟ।
ਅਸੀਂ ਜ਼ਿਆਦਾਤਰ ਗ੍ਰਾਫਿਕ ਅਤੇ ਪਰੇਸ਼ਾਨ ਕਰਨ ਵਾਲੇ ਚਿੱਤਰਾਂ ਨੂੰ ਅੱਲ੍ਹੜ ਬੱਚਿਆਂ ਤੋਂ ਲੁਕਾਉਂਦੇ ਹਾਂ, ਫਿਰ ਚਾਹੇ ਬਾਲਗਾਂ ਲਈ ਅਜਿਹੀ ਸਮੱਗਰੀ ਵਾਸਤੇ ਅਸੀਂ ਚਿਤਾਵਨੀ ਸਕ੍ਰੀਨ ਨਾਲ ਇਜਾਜ਼ਤ ਦੇ ਦਈਏ। ਉਦਾਹਰਨ ਲਈ, ਅਸੀਂ ਅਜਿਹੀ ਸਮੱਗਰੀ 'ਤੇ ਉਮਰ ਅਨੁਸਾਰ ਪ੍ਰਤੀਬੰਧ ਲਗਾਵਾਂਗੇ:
⚠️ ਗੰਭੀਰ ਰੂਪ ਵਿੱਚ ਸੜੇ ਹੋਏ ਵਿਅਕਤੀ ਦੀ ਫ਼ੋਟੋ, ਜਿਸ ਨੂੰ ਅਸੀਂ ਬਾਲਗਾਂ ਲਈ ਚਿਤਾਵਨੀ ਸਕ੍ਰੀਨ ਨਾਲ ਕਵਰ ਕਰਾਂਗੇ।
⚠️ ਗੋਲੀਬਾਰੀ, ਬੇਰਹਿਮੀ ਜਾਂ ਘਾਤਕ ਕਾਰ ਹਾਦਸਿਆਂ ਦੀ ਫ਼ੋਟੋ ਜਾਂ ਵੀਡੀਓ।
ਅਸੀਂ ਅੱਲ੍ਹੜ ਬੱਚਿਆਂ ਤੋਂ ਵਧੀਕ ਸਮੱਗਰੀ ਲੁਕਾਉਂਦੇ ਹਾਂ ਜਿਸ ਵਿੱਚ ਸਪਸ਼ਟ ਨੰਗੇਜ਼ ਜਾਂ ਜਿਨਸੀ ਗਤੀਵਿਧੀ ਸ਼ਾਮਲ ਨਹੀਂ ਹੁੰਦੀ ਪਰ ਇਸਨੂੰ ਜਿਨਸੀ ਤੌਰ 'ਤੇ ਸੁਝਾਅ ਦੇਣ ਵਾਲੀ ਮੰਨੀ ਜਾ ਸਕਦੀ ਹੈ। ਉਦਾਹਰਨ ਲਈ, ਅਸੀਂ ਅਜਿਹੀ ਸਮੱਗਰੀ 'ਤੇ ਉਮਰ ਅਨੁਸਾਰ ਪ੍ਰਤੀਬੰਧ ਲਗਾਵਾਂਗੇ:
⚠️ ਇੱਕ ਅਜਿਹੀ ਪੋਸਟ ਜਿਸ ਵਿੱਚ ਲਗਭਗ ਨੰਗੇਜ਼ ਨੂੰ ਡਿਜੀਟਲ ਓਵਰਲੇਅ ਨਾਲ ਕਵਰ ਕੀਤਾ ਗਿਆ ਹੈ।
⚠️ ਕਿਸੇ ਦੇ ਹਿਪਸ 'ਤੇ ਜ਼ੂਮ ਇਨ ਕੀਤੀ ਗਈ ਇੱਕ ਫ਼ੋਟੋ।
⚠️ ਜਿਨਸੀ ਮੁਲਾਕਾਤਾਂ ਦਾ ਵਰਣਨ ਕਰਨ ਵਾਲੀ ਜਿਨਸੀ ਸੰਕੇਤਕ ਭਾਸ਼ਾ ਵਾਲੀ ਸਟੋਰੀ, ਜਿਸ ਵਿੱਚ ਜਿਨਸੀ ਰੂਪਕਾਂ ਦੀ ਵਰਤੋਂ ਵੀ ਸ਼ਾਮਲ ਹੈ।
ਸਾਡੇ ਵੱਲੋਂ ਹਟਾਈ ਜਾਣ ਵਾਲੀ ਸਮੱਗਰੀ ਦੇ ਪੂਰੇ ਵੇਰਵਿਆਂ ਲਈ, ਸਾਡੀਆਂ ਭਾਈਚਾਰਕ ਮਿਆਰਾਂ ਦੇਖੋ।
ਅਸੀਂ ਹੋਰ ਕਿਸਮਾਂ ਦੀ ਸਮੱਗਰੀ ਦੀ ਸਿਫ਼ਾਰਸ਼ ਕਰਨ ਤੋਂ ਵੀ ਪਰਹੇਜ਼ ਕਰਾਂਗੇ, ਭਾਵੇਂ ਉਹ 13+ ਉਮਰ ਲਈ ਫ਼ਿਲਮ ਰੇਟਿੰਗ ਮਾਪਦੰਡਾਂ ਅਤੇ ਮਾਂ-ਪਿਓ ਦੇ ਫ਼ੀਡਬੈਕ ਅਨੁਸਾਰ ਹੋਵੇ। ਅਜਿਹੀ ਬਹੁਤ ਸਾਰੀ ਸਮੱਗਰੀ ਜਿਹੜੀ ਅਸੀਂ ਬਾਲਗਾਂ ਨੂੰ ਸਿਫ਼ਾਰਸ਼ ਕਰਨ ਤੋਂ ਪਰਹੇਜ਼ ਕਰਦੇ ਹਾਂ ਉਸ ਨੂੰ ਪਹਿਲਾਂ ਹੀ ਅੱਲ੍ਹੜ ਬੱਚਿਆਂ ਤੋਂ ਪੂਰੀ ਤਰ੍ਹਾਂ ਲੁਕਾਇਆ ਗਿਆ ਹੈ, ਪਰ ਅੱਲ੍ਹੜ ਬੱਚਿਆਂ ਸੰਬੰਧੀ ਅੱਗੇ ਵੱਧਦੇ ਹੋਏ ਅਸੀਂ ਵਧੀਕ ਕਿਸਮਾਂ ਦੀ ਸਮੱਗਰੀ ਦੀ ਸਿਫ਼ਾਰਸ਼ ਕਰਨ ਤੋਂ ਪਰਹੇਜ਼ ਕਰਦੇ ਹਾਂ - ਜਿਵੇਂ ਕਿ ਅਜਿਹੀਆਂ ਫ਼ੋਟੋਆਂ ਜਾਂ ਵੀਡੀਓਜ਼ ਜਿਹੜੀਆਂ ਸਪੱਸ਼ਟ ਤੌਰ 'ਤੇ ਜਿਨਸੀ ਤੌਰ 'ਤੇ ਗਾਲਾਂ ਦਾ ਪ੍ਰਦਰਸ਼ਨ ਕਰਦੀਆਂ ਹਨ ਜਾਂ ਉਚਾਈ ਤੋਂ ਛਾਲ ਮਾਰਨ ਵਰਗੇ ਜੋਖ਼ਮ ਭਰੇ ਸਟੰਟ ਦਿਖਾਉਂਦੀਆਂ ਹਨ।
ਸੀਮਿਤ ਸਮੱਗਰੀ: Instagram 'ਤੇ, ਉਨ੍ਹਾਂ ਮਾਂ-ਪਿਓ ਲਈ ਜਿਹੜੇ ਵਾਧੂ ਕੰਟਰੋਲ ਪਸੰਦ ਕਰਦੇ ਹਨ, ਅਸੀਂ ਇੱਕ ਨਵੀਂ, ਹੋਰ ਵੀ ਪਾਬੰਦੀਸ਼ੁਦਾ ਸੈਟਿੰਗ ਪੇਸ਼ ਕੀਤੀ ਹੈ ਜਿਸਨੂੰ ਸੀਮਿਤ ਸਮੱਗਰੀ ਕਿਹਾ ਜਾਂਦਾ ਹੈ। ਜਦੋਂ ਸੀਮਿਤ ਸਮੱਗਰੀ ਸੈਟਿੰਗ ਚਾਲੂ ਹੁੰਦੀ ਹੈ, ਤਾਂ ਅਸੀਂ ਅੱਲ੍ਹੜ ਬੱਚਿਆਂ ਦੇ ਅਕਾਊਂਟ ਦੇ ਅਨੁਭਵ ਤੋਂ ਹੋਰ ਵੀ ਸਮੱਗਰੀ ਨੂੰ ਲੁਕਾਉਣ ਲਈ ਆਪਣੇ ਸਮੱਗਰੀ ਫਿਲਟਰਾਂ ਨੂੰ ਵਧੇਰੇ ਮਜ਼ਬੂਤੀ ਨਾਲ ਲਾਗੂ ਕਰਾਂਗੇ। ਅਸੀਂ ਖੋਜ ਨਤੀਜਿਆਂ ਨੂੰ ਹੋਰ ਸੀਮਿਤ ਕਰਾਂਗੇ, ਅਤੇ ਅੱਲ੍ਹੜ ਬੱਚਿਆਂ ਦੀਆਂ ਪੋਸਟਾਂ ਦੇ ਹੇਠਾਂ ਕਮੈਂਟਾਂ ਨੂੰ ਦੇਖਣ, ਲਿਖਣ ਜਾਂ ਪ੍ਰਾਪਤ ਕਰਨ ਦੀ ਯੋਗਤਾ ਨੂੰ ਬੰਦ ਕਰ ਦਿਆਂਗੇ।
ਹੋਰ ਸਮੱਗਰੀ: ਅੱਲ੍ਹੜ ਬੱਚੇ ਸਿਰਫ਼ ਮਾਂ-ਪਿਓ ਦੀ ਇਜਾਜ਼ਤ ਨਾਲ ਹੀ 'ਹੋਰ ਸਮੱਗਰੀ' ਸੈਟਿੰਗ 'ਤੇ ਸਵਿੱਚ ਕਰ ਸਕਦੇ ਹਨ, ਜਿਸ ਨੂੰ ਮਾਂ-ਪਿਓ ਸਿਰਫ਼ ਪੇਅਰੈਂਟਲ ਨਿਗਰਾਨੀ ਰਾਹੀਂ ਹੀ ਪ੍ਰਦਾਨ ਕਰ ਸਕਦੇ ਹਨ। ਇਸ ਸੈਟਿੰਗ ਵਿੱਚ, ਅੱਲ੍ਹੜ ਬੱਚਿਆਂ ਨੂੰ ਹਾਲੇ ਵੀ ਸਵੈਚਲ ਸੁਰੱਖਿਆਵਾਂ ਦਾ ਲਾਭ ਮਿਲੇਗਾ ਕਿਉਂਕਿ ਇਹ ਬਾਲਗਾਂ ਦੇ ਮੁਕਾਬਲੇ ਅੱਲ੍ਹੜ ਬੱਚਿਆਂ ਤੋਂ ਜ਼ਿਆਦਾ ਸਮੱਗਰੀ ਲੁਕਾਉਂਦੀ ਹੈ, ਅਤੇ ਅਸੀਂ ਹਾਲੇ ਵੀ ਸਮੱਗਰੀ ਨੂੰ ਪੂਰੀ ਤਰ੍ਹਾਂ ਹਟਾ ਦਿਆਂਗੇ ਜੇ ਇਹ ਸਾਡੀਆਂ ਭਾਈਚਾਰਕ ਮਿਆਰਾਂ ਦੀ ਉਲੰਘਣਾ ਕਰਦੀ ਹੈ। ਹਾਲਾਂਕਿ, ਅੱਲ੍ਹੜ ਬੱਚਿਆਂ ਨੂੰ ਕੁਝ ਅਜਿਹੀ ਸਮੱਗਰੀ ਦੀ ਸਿਫ਼ਾਰਸ਼ ਕੀਤੀ ਜਾ ਸਕਦੀ ਹੈ ਜਿਸ ਨੂੰ ਉਹ 13+ ਅਤੇ ਸੀਮਿਤ ਸਮੱਗਰੀ ਸੈਟਿੰਗਾਂ ਵਿੱਚ ਨਹੀਂ ਦੇਖ ਸਕਣਗੇ, ਅਤੇ ਅਸੀਂ ਉਨ੍ਹਾਂ ਸਾਰੇ ਅਕਾਊਂਟਾਂ ਨੂੰ ਨਹੀਂ ਲੁਕਾਵਾਂਗੇ ਜਿਹੜੇ ਉਮਰ ਅਨੁਸਾਰ-ਅਢੁਕਵੀਂ ਸਮੱਗਰੀ ਨੂੰ ਸਾਂਝੀ ਕਰਦੇ ਹਨ।
ਡਿਸਕਲੇਮਰ: ਸੋਸ਼ਲ ਮੀਡੀਆ ਅਤੇ ਫ਼ਿਲਮਾਂ ਵਿੱਚ ਬਹੁਤ ਅੰਤਰ ਹੁੰਦਾ ਹੈ। ਅਸੀਂ ਆਪਣੀਆਂ ਸਮੱਗਰੀ ਸੈਟਿੰਗਾਂ ਨੂੰ ਅੱਪਡੇਟ ਕਰਦੇ ਸਮੇਂ MPA ਨਾਲ ਕੰਮ ਨਹੀਂ ਕੀਤਾ, ਅਤੇ ਉਹ Instagram ਅਤੇ Facebook 'ਤੇ ਕਿਸੇ ਵੀ ਸਮੱਗਰੀ ਨੂੰ ਰੇਟਿੰਗ ਨਹੀਂ ਦੇ ਰਹੇ ਹਨ, ਅਤੇ ਉਹ ਕਿਸੇ ਵੀ ਤਰੀਕੇ ਨਾਲ ਸਾਡੀਆਂ ਸਮੱਗਰੀ ਸੈਟਿੰਗਾਂ ਦਾ ਸਮਰਥਨ ਜਾਂ ਮਨਜ਼ੂਰੀ ਨਹੀਂ ਦੇ ਰਹੇ ਹਨ। ਇਸ ਦੀ ਬਜਾਏ, ਅਸੀਂ ਮਾਂ-ਪਿਓ ਲਈ ਪਹਿਲਾਂ ਤੋਂ ਜਾਣੂ MPA ਦੀਆਂ ਗਾਈਡਲਾਈਨਾਂ ਤੋਂ ਪ੍ਰੇਰਣਾ ਲੈਂਦੇ ਹਾਂ, ਅਤੇ ਨਾਲ ਹੀ ਮਾਂ-ਪਿਓ ਤੋਂ ਫ਼ੀਡਬੈਕ ਵੀ ਲੈਂਦੇ ਹਾਂ। ਸਾਡੇ ਸਮੱਗਰੀ ਸੰਚਾਲਨ ਸਿਸਟਮ ਫ਼ਿਲਮ ਰੇਟਿੰਗ ਬੋਰਡ ਦੇ ਸਮਾਨ ਨਹੀਂ ਹਨ, ਇਸ ਲਈ ਹੋ ਸਕਦਾ ਹੈ ਕਿ ਅਨੁਭਵ ਬਿਲਕੁਲ ਇੱਕੋ ਜਿਹਾ ਨਾ ਹੋਵੇ।
ਉਲੰਘਣਾ ਵਾਲੀ ਸਮੱਗਰੀ ਦੀ ਰਿਪੋਰਟ ਕਰਨ ਦਾ ਤਰੀਕਾ
ਅਸੀਂ ਸਾਡੇ ਨਿਯਮਾਂ ਨੂੰ ਤੋੜਨ ਵਾਲੀ ਸਮੱਗਰੀ ਦੀ ਪਛਾਣ ਕਰਨ ਲਈ ਸਖਤ ਮਿਹਨਤ ਕਰਦੇ ਹਾਂ, ਅਤੇ ਸਾਨੂੰ ਜ਼ਿਆਦਾਤਰ ਅਜਿਹੀ ਸਮੱਗਰੀ ਦਾ ਪਤਾ ਚੱਲਦਾ ਹੈ ਜਿਸ ਨੂੰ ਅਸੀਂ ਸਾਨੂੰ ਰਿਪੋਰਟ ਕੀਤੇ ਜਾਣ ਤੋਂ ਪਹਿਲਾਂ ਹੀ ਆਪਣੀ ਤਕਨੀਕ ਦੀ ਵਰਤੋਂ ਕਰਕੇ ਕਿਰਿਆਸ਼ੀਲਤਾ ਨਾਲ ਹਟਾ ਦਿੰਦੇ ਹਾਂ। ਜੇ ਤੁਸੀਂ ਕੋਈ ਅਜਿਹੀ ਚੀਜ਼ ਦੇਖਦੇ ਹੋ ਜਿਸ ਤੋਂ ਅਸੀਂ ਖੁੰਝ ਗਏ ਹਾਂ, ਤਾਂ ਕਿਰਪਾ ਕਰਕੇ Facebook ਜਾਂ Instagram ਵਿੱਚੋਂ ਕਿਸੇ 'ਤੇ ਵੀ ਰਿਪੋਰਟ ਕਰਕੇ ਸਾਡੇ ਪਲੇਟਫ਼ਾਰਮਾਂ ਨੂੰ ਇੱਕ ਸੁਰੱਖਿਅਤ ਸਥਾਨ ਬਣਾਉਣ ਵਿੱਚ ਮਦਦ ਕਰੋ। ਸਾਰੀਆਂ ਰਿਪੋਰਟਾਂ ਗੁਮਨਾਮ ਹਨ।
ਵਧੀਕ ਸਰੋਤ
ਸਾਡੀਆਂ ਭਾਈਚਾਰਕ ਮਿਆਰਾਂ ਵਿੱਚ ਸਮੱਗਰੀ ਦੀਆਂ ਉਨ੍ਹਾਂ ਕਿਸਮਾਂ ਜਿੰਨਾਂ ਨੂੰ ਅਸੀਂ ਹਟਾਉਂਦੇ ਹਾਂ ਅਤੇ ਹਰੇਕ ਨੀਤੀ ਖੇਤਰ ਵਾਸਤੇ ਉਮਰ-ਸੀਮਾ ਸੰਬੰਧੀ ਵੇਰਵੇ ਸ਼ਾਮਲ ਹੁੰਦੇ ਹਨ। ਉਨ੍ਹਾਂ ਨੂੰ ਪੜ੍ਹਨ ਲਈ, ਇੱਥੇ ਕਲਿੱਕ ਕਰੋ.
ਅਸੀਂ ਅਜਿਹੀ ਤਕਨੀਕ ਵੀ ਵਿਕਸਿਤ ਕੀਤੀ ਹੈ ਜੋ ਸੰਭਾਵਿਤ ਸ਼ੱਕੀ ਬਾਲਗਾਂ ਦੀ ਕਿਰਿਆਸ਼ੀਲਤਾ ਨਾਲ ਪਛਾਣ ਕਰਦੀ ਹੈ, ਜਿਵੇਂ ਕਿ ਇੱਕ ਅਜਿਹਾ ਬਾਲਗ ਜਿਸ ਨੂੰ ਅੱਲ੍ਹੜ ਬੱਚਿਆਂ ਦੁਆਰਾ ਵਾਰ-ਵਾਰ ਬਲੌਕ ਕੀਤਾ ਗਿਆ ਹੈ ਜਾਂ ਉਸ ਦੀ ਰਿਪੋਰਟ ਕੀਤੀ ਗਈ ਹੈ, ਜਾਂ ਜੇ ਕੋਈ ਬਾਲਗ ਵਾਰ-ਵਾਰ ਉਲੰਘਣਾ ਕਰਨ ਵਾਲੀ ਸਮੱਗਰੀ ਦੀ ਖੋਜ ਕਰਦਾ ਹੈ। ਅਸੀਂ ਅੱਲ੍ਹੜ ਬੱਚਿਆਂ ਨੂੰ ਸ਼ੱਕੀ ਬਾਲਗਾਂ ਦੀ ਸਿਫਾਰਸ਼ ਨਹੀਂ ਕਰਾਂਗੇ, ਅਤੇ ਅਸੀਂ ਸ਼ੱਕੀ ਬਾਲਗਾਂ ਨੂੰ ਅੱਲ੍ਹੜ ਬੱਚਿਆਂ ਦੀ ਸਿਫਾਰਸ਼ ਨਹੀਂ ਕਰਾਂਗੇ। ਤੁਸੀਂ ਇਸ ਬਾਰੇ ਇੱਥੇ ਹੋਰ ਪੜ੍ਹ ਸਕਦੇ ਹੋ।
ਤੁਸੀਂ ਸੁਰੱਖਿਆ ਕੇਂਦਰ 'ਤੇ ਉਨ੍ਹਾਂ ਤਰੀਕਿਆਂ ਬਾਰੇ ਹੋਰ ਪੜ੍ਹ ਸਕਦੇ ਹੋ ਜਿੰਨ੍ਹਾਂ ਰਾਹੀਂ ਅਸੀਂ ਆਪਣੇ ਭਾਈਚਾਰੇ ਨੂੰ ਸੁਰੱਖਿਅਤ ਰੱਖਣ ਵਿੱਚ ਮਦਦ ਕਰਦੇ ਹਾਂ, ਅਤੇ ਉਨ੍ਹਾਂ ਤਰੀਕਿਆਂ ਬਾਰੇ ਹੋਰ ਪੜ੍ਹ ਸਕਦੇ ਹੋ ਜਿੰਨ੍ਹਾਂ ਰਾਹੀਂ ਅਸੀਂ ਆਪਣੇ ਫੈਮਿਲੀ ਸੈਂਟਰ 'ਤੇ ਅੱਲ੍ਹੜ ਬੱਚਿਆਂ ਅਤੇ ਪਰਿਵਾਰਾਂ ਦੀ ਸਹਾਇਤਾ ਕਰਦੇ ਹਾਂ।