လူထုအုံကြွမှု ဖြစ်ပွားစဉ် လူသိများသောပုဂ္ဂိုလ်များ၏ အကောင့်များကို ကန့်သတ်ခြင်း

၂၀၂၃ ခုနှစ်၊ ဇန်နဝါရီလ ၃၀ ရက်တွင် မူလက စတင်ဖြန့်ချိခဲ့သည့် ပရိုတိုကော

သာမန်အားဖြင့် လူများက Facebook လူမှုစံနှုန်းများ သို့မဟုတ် Instagram လူမှုအဖွဲ့အစည်းဆိုင်ရာ လမ်းညွှန်ချက်များကို ချိုးဖောက်သည့်အခါ ၎င်းတို့သည် ပို့စ်တင်ခြင်း၊ မှတ်ချက်ပေးခြင်း၊ Facebook Live အသုံးပြုခြင်း သို့မဟုတ် စာမျက်နှာ ဖန်တီးခြင်းကဲ့သို့ အကြောင်းအရာ ဖန်တီးခွင့်မှ ကန့်သတ်ခံရနိုင်သည်။ ပုံမှန်အားဖြင့် တစ်ရက်မှ ရက် ၃၀ အထိ ကြာမြင့်သည့် ဤပုံမှန်ကန့်သတ်ချက်များသည် သတ်မှတ်အချိန်ကာလတစ်ခုကြာ နောက်ထပ်ချိုးဖောက်မှုများကို ဖယ်ထုတ်ထားရန်နှင့် လူများအား နောင်ချိုးဖောက်မှုများမပြုအောင် တားမြစ်ရန် ရည်ရွယ်သည်။ ၎င်းတို့ကျူးလွန်ထားသည့် ချိုးဖောက်မှုအတွက် သင့်တင့်မျှတသော ကန့်သတ်ချက်များကို ထားရှိရန် ကျွန်ုပ်တို့ကြိုးပမ်းပါသည်။

အကြိမ်ကြိမ် သတိပေးချက်များနှင့် ကန့်သတ်ချက်များ ရှိလင့်ကစား ကျွန်ုပ်တို့၏ လူမှုစံနှုန်းများ သို့မဟုတ် လူမှုအဖွဲ့အစည်းဆိုင်ရာ လမ်းညွှန်ချက်များကို ထပ်ခါထပ်ခါ ချိုးဖောက်ခြင်းကြောင့် သို့မဟုတ် အချို့သော အလွန်ဆိုးဆိုးဝါးဝါး စည်းကမ်းချိုးဖောက်မှုများကြောင့် အကောင့်များကို ကျွန်ုပ်တို့ ပိတ်ပင်နိုင်သည်။

လူသိများသောပုဂ္ဂိုလ်များနှင့် လူထုအုံကြွမှု

ကျွန်ုပ်တို့၏ ပုံမှန်ကန့်သတ်ချက်များသည် ချိုးဖောက်မှုအတွက် သင့်တင့်မျှတမှုမရှိခြင်း သို့မဟုတ် လက်ရှိဖြစ်ပွားနေဆဲ အကြမ်းဖက်မှု သို့မဟုတ် လူထုအုံကြွမှု ကာလအတွင်း လူသိများသောပုဂ္ဂိုလ်များက အကြောင်းအရာတင်သည့် အခြေအနေမျိုးတွင် နောက်ထပ် ထိခိုက်မှုအန္တရာယ်ဖြစ်နိုင်ခြေကို လျှော့ချရန် လုံလောက်မှုမရှိခြင်း ဖြစ်နိုင်သည်။

လူသိများသောပုဂ္ဂိုလ်များသည် ကျွန်ုပ်တို့၏ ပလက်ဖောင်းများအနှံ့ တွင်ကျယ်စွာ လွှမ်းမိုးမှုရှိတတ်သောကြောင့် ၎င်းတို့က ကျွန်ုပ်တို့၏ မူဝါဒများကို ချိုးဖောက်သည့်အခါ ထိခိုက်မှုအန္တရာယ် ပိုမိုကြီးမားနိုင်သည်။ လူသိများသောပုဂ္ဂိုလ်များ ဆိုသည်မှာ ပြည်နယ်နှင့် နိုင်ငံတော်အဆင့် အစိုးရအရာရှိများ၊ ထိုအစိုးရရုံးဌာနများအတွက် နိုင်ငံရေး ကိုယ်စားလှယ်လောင်းများ၊ လူမှုကွန်ရက်တွင် ပရိသတ် သို့မဟုတ် စောင့်ကြည့်သူ တစ်သန်းအထက်ရှိသူများနှင့် သတင်းထုတ်ပြန်ချက်များတွင် အလွန်အမင်း ဖော်ပြခံရသူများအဖြစ် ကျွန်ုပ်တို့ အဓိပ္ပာယ်သတ်မှတ်သည်။

လက်ရှိဖြစ်ပေါ်နေဆဲ အကြမ်းဖက်ဖြစ်ရပ်များ သို့မဟုတ် လူထုအုံကြွမှုကို လှုံ့ဆော်သည့် သို့မဟုတ် ချီးကျူးဂုဏ်ပြုသည့် နည်းလမ်းများဖြင့် ကျွန်ုပ်တို့၏ မူဝါဒများကို ချိုးဖောက်သည့် လူသိများသောပုဂ္ဂိုလ်တစ်ဦးအတွက် သင့်လျော်သော ကန့်သတ်ချက်ကို ဆုံးဖြတ်သည့်အခါ အောက်ပါအချက်များကို ကျွန်ုပ်တို့ ထည့်သွင်းစဉ်းစားနိုင်သည်-

• ချိုးဖောက်မှု၏ပြင်းထန်မှုအဆင့်၊ လက်ရှိနှင့် ယခင်ချိုးဖောက်မှုများ အပါအဝင် Facebook သို့မဟုတ် Instagram တွင် လူသိများသောပုဂ္ဂိုလ်၏ ချိုးဖောက်မှုမှတ်တမ်း။

• အကြမ်းဖက်မှုတွင်ပါဝင်သော လူပုဂ္ဂိုလ်များအပေါ် လူသိများသောပုဂ္ဂိုလ်၏ အလားအလာရှိသော လွှမ်းမိုးမှုနှင့် ၎င်းတို့နှင့် ပတ်သက်မှု။

• အကြမ်းဖက်မှုနှင့် အခြားဆက်စပ်သော ကိုယ်ထိလက်ရောက် ထိခိုက်နာကျင်စေမှုမှန်သမျှ၏ ပြင်းထန်မှုအဆင့်

လူထုအုံကြွမှုနှင့် လက်ရှိအကြမ်းဖက်မှု ဖြစ်နေစဉ် ကာလအတွင်း ကျွန်ုပ်တို့သည် ဤအချက်များကို အသုံးပြု၍ သင့်လျော်သော ကန့်သတ်မှုကြာမြင့်ချိန်ကို တစ်လမှ ၂ နှစ်အထိ အပိုင်းအခြားအလိုက် ဆုံးဖြတ်ပါသည်။ ချိုးဖောက်မှုအများစုအတွက် လူသိများသောပုဂ္ဂိုလ်တစ်ဦးသည် အကြောင်းအရာ ဖန်တီးခွင့်မှ တစ်လကြာ ကန့်သတ်ခံရပါမည်။ တိုက်ခိုက်မှုဖြစ်ပွားပြီးနောက်ပိုင်း အခြေအနေတွင် အကြမ်းဖက်အဖွဲ့တစ်ဖွဲ့၏ ထုတ်ပြန်ချက်အတွက် လင့်ခ်ကို မျှဝေခြင်းကဲ့သို့ ပိုမိုဆိုးဝါးသော ချိုးဖောက်မှုများသည် အကြောင်းအရာ ဖန်တီးခွင့်မှ ၆ လကြာ သို့မဟုတ် ၁၂ လကြာ ကန့်သတ်ခံရမည်။ ပြင်းထန်မှုမြင့်သည့် အကြမ်းဖက်မှုဆိုလျှင် ကျွန်ုပ်တို့သည် အကောင့်ကို ၂ နှစ်ကြာ ကန့်သတ်ပါမည်။

ကန့်သတ်ကာလပြီးဆုံးချိန်တွင် အများပြည်သူ အန္တရာယ်ကင်းရှင်းရေးပေါ် ထိခိုက်နိုင်ခြေ လျော့ပါးသွားခြင်းရှိ၊ မရှိ အကဲဖြတ်ရန် ကျွမ်းကျင်သူများကို ကျွန်ုပ်တို့ အားကိုးတကြီး မျှော်လင့်ပါမည်။ အကြမ်းဖက်မှုဖြစ်စဉ်များ၊ ငြိမ်းချမ်းစွာစုဝေးမှုအပေါ် ကန့်သတ်ချက်များနှင့် ကမ္ဘာအနှံ့ ဆူပူအုံကြွမှု သို့မဟုတ် လူထုအုံကြွမှုဆိုင်ရာ အခြားပြယုဂ်များ အပါအဝင် ပြင်ပအချက်များကိုလည်း ကျွန်ုပ်တို့အကဲဖြတ်ပါမည်။ အများပြည်သူ အန္တရာယ်ကင်းရှင်းရေးအပေါ် ပြင်းထန်သော ထိခိုက်နိုင်ခြေ ဆက်ရှိနေသေးသည်ဟု ကျွန်ုပ်တို့ဆုံးဖြတ်ပါက ကန့်သတ်ချက်ကို သတ်မှတ်အချိန်ကာလတစ်ခုအထိ ထပ်တိုးပြီး အန္တရာယ်မလျော့ပါးမချင်း ဆက်လက်၍ ပြန်လည်အကဲဖြတ်ပါမည်။

ကန့်သတ်ကာလပြည့်ပြီးနောက် လူသိများသောပုဂ္ဂိုလ်တစ်ဦးက Facebook သို့မဟုတ် Instagram သို့ ပြန်လည်ရောက်ရှိလာသောအခါ ထပ်ဆောင်းပြစ်ဒဏ်များ

လူသိများသောပုဂ္ဂိုလ်အပေါ် ကန့်သတ်ထားမှု သက်တမ်းစေ့ပြီး ၎င်းတို့သည် Facebook သို့မဟုတ် Instagram ကို ပြန်လည်အသုံးပြုခွင့် ရရှိပါက ထပ်ခါထပ်ခါ ချိုးဖောက်မှုများ မဖြစ်စေရန်အတွက် ၎င်းတို့ကို မြင့်မားသောပြစ်ဒဏ်များ ချမှတ်သွားပါမည်။ လတ်တလော ချိုးဖောက်မှုအသစ်များသည် အကြောင်းအရာဖန်တီးခွင့်မှ တစ်လကြာ ကန့်သတ်ခံရစဉ် ပိုမိုပြင်းထန်သော ချိုးဖောက်မှုများသည် နောက်ထပ် ၂ နှစ်ကြာ ကန့်သတ်ခံရပါမည်။ ထုံးစံအတိုင်း ကျွန်ုပ်တို့က အကြိမ်ကြိမ် သတိပေးချက်များနှင့် ကန့်သတ်မှုများ ပြုလုပ်သော်ငြားလည်း စည်းကမ်းချိုးဖောက်မှုရှိသည့် အကြောင်းအရာကို ဆက်လက်၍ ပို့စ်တင်နေသည့် အကောင့်မှန်သမျှကိုလည်း ပိတ်ပင်နိုင်ပါသည်။

အကြောင်းအရာက ကျွန်ုပ်တို့၏လူမှုစံနှုန်းများကို မချိုးဖောက်သော်လည်း လူသိများသောပုဂ္ဂိုလ်အပေါ် ကနဦးဆိုင်းငံ့ခဲ့ရသည့် အရင်းခံအကြောင်းရင်းဖြစ်သော အန္တရာယ်မျိုးကို ဖြစ်ပေါ်စေသည်ဆိုလျှင် ကျွန်ုပ်တို့သည် ထိုကဲ့သို့ပို့စ်များ၏ ပျံ့နှံ့မှုကို ကန့်သတ်နိုင်ပြီး ထပ်ခါထပ်ခါဆိုလျှင် ကျွန်ုပ်တို့၏ ကြော်ငြာကိရိယာများအား အသုံးပြုခွင့်ကို ယာယီကန့်သတ်နိုင်သည်။ ဤအဆင့်သည် အကြောင်းအရာကို လူသိများသောပုဂ္ဂိုလ်၏ အကောင့်တွင် ဆက်မြင်ရမည်ဖြစ်သော်လည်း ထိုလူသိများသောပုဂ္ဂိုလ်ကို လူများစောင့်ကြည့်ထားသည့်တိုင် ၎င်းတို့၏အလင်းစဉ်များတွင် ပျံ့နှံ့နေမည်မဟုတ်ဟု ဆိုလိုပါမည်။ ကျွန်ုပ်တို့သည် ထပ်ပြီးမျှဝေရန် ခလုတ်ကိုလည်း ထိုကဲ့သို့ပို့စ်များမှ ဖယ်ရှားနိုင်ပြီး ၎င်းတို့ကို အကြံပြုခြင်း သို့မဟုတ် ကြော်ငြာများအဖြစ် ပြသခြင်းမှလည်း ရပ်တန့်နိုင်သည်။ လူသိများသောပုဂ္ဂိုလ်က လူမှုစံနှုန်းများကို အတိအကျ ချိုးဖောက်သည့် အကြောင်းအရာကို တင်သော်လည်း ကျွန်ုပ်တို့၏ သတင်းဖြစ်လောက်သည့် အကြောင်းအရာဆိုင်ရာ မူဝါဒအရ ထိုပုဂ္ဂိုလ်တင်ထားသည့် ရေးသားဖော်ပြချက်ကို သိရှိခြင်းကြောင့် အများပြည်သူအကျိုးစီးပွားက အန္တရာယ်ဖြစ်နိုင်ခြေမှန်သမျှထက် ပိုအလေးသာကြောင်း ကျွန်ုပ်တို့အကဲဖြတ်ပါက ကျွန်ုပ်တို့သည် ထိုကဲ့သို့ပို့စ်များ၏ ပျံ့နှံ့မှုကို ကန့်သတ်ရန် အလားတူ ရွေးချယ်နိုင်သော်လည်း ၎င်းတို့ကို လူသိများသောပုဂ္ဂိုလ်၏ အကောင့်တွင် မြင်ရအောင် ဆက်ထားနိုင်သည်။ ပျံ့နှံရောက်ရှိမှုနှုန်းမြင့်ပြီး ဩဇာလွှမ်းမိုးမှုရှိသော အသုံးပြုသူများအပေါ် ကြီးကြပ်ရေးဘုတ်အဖွဲ့၏ အလေးပေးမှုနှင့် "အကြောင်းအရာဆိုင်ရာ မူဝါဒများအပေါ် ဆိုးဆိုးဝါးဝါး စည်းကမ်းချိုးဖောက်မှုများကို တုံ့ပြန်သည့် သင့်တင့်မျှတပြီး လိုအပ်သော ပြစ်ဒဏ်များကို ဖန်တီးရန်" Meta ၏ အခန်းကဏ္ဍအပေါ် ၎င်း၏ အလေးပေးမှုကို ထည့်သွင်းစဉ်းစား၍ ဤအဆင့်များကို ကျွန်ုပ်တို့လုပ်ဆောင်နေပါသည်။

ပုံမှန်စိစစ်သုံးသပ်မှု

အပ်ဒိတ် ၂၀၂၄ ခုနှစ်၊ ဇူလိုင်လ ၁၂ ရက်

ကျွန်ုပ်တို့၏အသုံးပြုသူများသည် ကျွန်ုပ်တို့၏ပလက်ဖောင်းများပေါ်ရှိ နိုင်ငံရေးကိုယ်စားလှယ်လောင်းထံမှ သတင်းစကားကို ကြားသိနိုင်ကြောင်း သေချာစေရေးအလို့ငှာ ကျွန်ုပ်တို့သည် လူမှုစံနှုန်း ချိုးဖောက်မှုများအတွက် ပိုမိုပြင်းထန်သောပြစ်ဒဏ်များက ဆက်လက်သင့်လျော်မှုရှိ၊ မရှိ ဆုံးဖြတ်ရန် ဤပရိုတိုကောပေါ်မူတည်၍ အကောင့်များကို ရှေ့ဆက်၍ ပုံမှန်စိစစ်သုံးသပ်မည်ဖြစ်သည်။ ကြီးကြပ်ရေးဘုတ်အဖွဲ့က ဖော်ပြထားသည့်အတိုင်း “နိုင်ငံရေးဆိုင်ရာ ထုတ်ဖော်ပြောဆိုမှုကို ခွင့်ပြုရန်" ကျွန်ုပ်တို့၏တာဝန်ကို "အခြားသော လူ့အခွင့်အရေးများအပေါ် ဆိုးဆိုးဝါးဝါး ထိခိုက်နိုင်ခြေများကို ရှောင်ရှားရန်” ကျွန်ုပ်တို့၏တာဝန်နှင့်ယှဉ်၍ ချိန်ဆသုံးသပ်ခြင်းဖြင့် ဤဆုံးဖြတ်ချက်ကို ချမှတ်ရပေမည်။