Policy Rationale
Aron magpabiling luwas ang komunidad ug gawasnong makapahyag ang mga tanan, tangtangon o limitahan namo ang mga account nga makadaot sa komunidad. Naghimo mig awtomatiko ug manomano nga mga sistema aron tangtangon o limitahan ang mga account nga balikbalik o seryosong misupak sa among mga palisiya sa bisan hain sa among mga produkto.
Kay seryosong aksyon man ang pagtangtang sa account, naningkamot mig hatagan usa og kahigayonan ang mga tawo makat-onan ug sundon ang mga Tamdanan sa Komunidad. Pananglitan, kada naa mi tangtangon nga content, sagad makadawat ug pahibalo ang user ug sagad mohatag mig impormasyon kon unsay nasupak ug kon unsang mga restriksiyon ang gihatag. Ang aksyon nga among buhaton aron ipatuman ang among mga tamdanan magdepende sa kabug-at sa pagsupak, kasaysayan sa account kon bahin sa pagsupak, ug kon unsa ni kadelikado para sa komunidad. Ma-disable ang account kon magpadayon ang pagsupak bisan pag kapila na gihatagan og warning ug mga restriksiyon, o kon moresultag grabeng kapeligrohan ang pagsupak.
Pagkat-on og dugang kon giunsa pagpatuman sa Meta ang mga palisiya ug restriksiyon sa mga account diha sa Transparency Center. Limitahan o i-disable tingali namo ang mga account, ubang entidad (Mga page, grupo, event) o mga asset sa negosyo (mga Business Manager, ad account) nga:
Misupak sa among mga Tamdanan sa Komunidad nga nagpahinabog grabeng kadaot, apil kadtong among gisumbong sa tigpatuman sa balaod tungod sa seguradong kadaot nga posibleng mahitabo sa usa ka indibidwal o sa publiko
Misupak sa among mga Tamdanan sa Komunidad nga posibleng magpahinabog bisan unsang kadaot nga kinahanglang isumbong sa tigpatuman sa balaod tungod sa seguradong kadaot nga posibleng mahitabo sa usa ka indibidwal o sa publiko
Misupak sa among mga Tamdanan sa Advertising nga konektado sa makailad o delikadong mga kapeligrohan sa negosyo
Kanunayng misupak sa among mga Tamdanan sa Komunidad pinaagi sa pag-post og supak nga content ug/o pagdumala og supak nga mga entidad o mga asset sa negosyo
Kanunayng nagsupak sa among mga Tamdanan sa Advertising
Nagpakitag mga aktibidad o binuhatan nga naay klarong pagsupak
Limitahan o i-disable tingali namo ang mga account, ubang entidad (Mga page, grupo, event) o mga asset sa negosyo (mga Business Manager, ad account) nga:
Gipanag-iya sa usa ra ka tawo o entidad ingong account nga na-disable na
Gihimo o giusab ang katuyoan aron malikayan nga matangtang ang kanhing account o entidad, apil kadtong nakita nga usa ray tag-iya ug content parehas sa mga account o entidad nga una nang natangtang
Gihimo aron kontakon ang usa ka user nga gi-block na ang account
Gigamit aron malikayan ang among mga aksyon sa pagpatuman o mga proseso sa pagrebyo
Limitahan o i-disable tingali namo ang mga account, ubang entidad (Mga page, grupo, event) o mga asset sa negosyo (mga Business Manager, ad account) nga nagpakitag:
Suod nga koneksyon sa usa ka network sa mga account o uban pang entidad nga misupak o milikay sa among mga palisiya
Pagpakigtinabangay sa usa ka network sa mga account o uban pang entidad nga kanunay o grabeng misupak sa among mga palisiya
Aktibidad o binuhatan nga klarong misupak pinaagi sa usa ka network sa mga account
Maningkamot ming malimitahan o ma-disbale ang mga account o uban pang entidad (mga page, grupo, event), o mga asset sa negosyo (Business Manager, ad account) nga nagahimog aktibidad sa gawas sa platform nga posibleng makadaot sa among platform, apil kadtong:
Gipanag-iya niadtong napamatud-ang sex offender, napamatud-ang sekswal nga nag-abuso og mga bata o mga adulto
Gipanag-iya sa usa sa Gitudlong Entidad o nag-operate sa ilang ngalan
Dili puwedeng modawat og mga produkto, serbisyo, o software ilawom sa nahiangayng mga balaod
Sa mosunod nga mga senaryo, mangayo tingali mig dugang impormasyon bahin sa usa ka account aron maseguro ang pagpanag-iya ug/o gitugotang aktibidad:
Nakompromisong mga account
Paghimo og paggamit og usa ka account o uban pang entidad sa awtomatikong mga paagi, sama sa scripting (gawas kon gihimo ang scripting sa awtorisadong mga paagi ug wala makasupak sa among mga palisiya)
Walay unod nga mga accounts nga dugay nang dili aktibo