Mga Tamdanan sa Komunidad
Introduksiyon
Kini nga mga tamdanan gibase sa feedback gikan sa mga tawo ug sa tambag sa mga eksperto sa mga natad nga sama sa teknolohiya, safety sa publiko ug mga katungod sa tawo. Aron maseguro nga gipabilhan ang opinyon sa tanan, naningkamot sa mi sa paghimog mga tamdanan nga naglakip sa lainlaing panglantaw ug pagtulon-an, ilabina gikan sa mga tawo ug komunidad nga sagad dili matagad o makadawat og diskriminasyon.
Kada adlaw, mogamit og Facebook, Instagram, Messenger ug Threads ang mga tawo aron ipaambit ang ilang mga kasinatian, makigkontakay sa ilang mga higala, ug pamilya, ug maghimog mga komunidad. Tungod sa among mga serbisyo, bilyon-bilyong tawo ang gawasnong makapahayag sa ilang kaugalingon diha sa lainlaing nasod ug kultura ug sa daghang pinulongan.
Giila sa Meta kon unsa ka importante nga ang Facebook, Instagram, Messenger ug Threads mahimong lugar diin madasig ang mga tawo sa pagpakigkomunikar, ug giseryoso namo ni nga papel aron malikayan ang pag-abuso diha sa serbisyo. Kanay rason kon nganong naghimo mig mga tamdanan kon unsay puwede ug dili puwede niini nga mga serbisyo.
Palihog hinumdomi nga ang US English nga bersyon sa mga Tamdanan sa Komunidad nagpakita sa pinaka-updated nga mga palisiya ug kinahanglang gamiton ingon nga pangunang dokumento.
Among panaad sa pagpabili sa opinyon
Tumong sa among mga Tamdanan sa Komunidad ang paghimog usa ka dapit diin makapahayag ang mga tawo sa ilang opinyon. Gusto sa Meta nga gawasnong makapahayag ang mga tawo bahin sa mga isyu nga importante para nila, kini man pinaagi sa sinulat nga mga komento, hulagway, musika, o uban pang artistic nga paagi, bisag naay mga dili uyon nila o naay naghunahuna nga morag nakapasakit sila. Sa pipila ka kahimtang, tugotan namo content—nga supak sa among mga tamdanan—kon kini angayng ibalita ug para sa interes sa publiko. Himoon lang namo ni kon amo nang natimbang-timbang ang kaimportante sa interes sa publiko kon itandi sa kapeligrohan, ug among tan-awon ang among mga tamdanan sa internasyonal nga mga katungod sa tawo aron himoon ni nga mga desisyon. Sa ubang kaso, tangtangon tingali namo ang content nga naggamit og mga pulong nga dobleg kahulogan o naay gitago nga laing kahulogan dihang masabtan namo nga ang content supak sa among mga tamdanan sa tabang sa dugang konteksto.
Importante kaayo namo ang among gawasnong pagpahayag, pero among giila nga naay bag-o ug mas daghang kahigayonan diha sa internet para sa pag-abuso. Tungod niini, dihang limitahan namo ang pagpahayag, himoon namo ni para sa usa o kapin pa sa mosunod nga mga prinsipyo:
PAGKATINUOD
Gusto namong seguroon nga tinuod ang content nga makita sa mga tawo. Nagtuo mi nga ang pagkatinuod magbukas og mas maayong kahigayonan para sa pagpaambit, ug kanay rason kon nganong dili mi gustong masaypan og sabot niadtong naggamit sa among mga serbisyo kon kinsa sila o kon unsa ang ilang ginahimo.
SAFETY
Dedikado ming himoong luwas ang Facebook, Instagram, Messenger ug Threads. Tangtangon namo ang content nga makaamot sa kapeligrohan nga madaot ang pisikal nga seguridad sa mga tawo. Dili puwede diha sa among mga serbisyo ang content nga nanghadlok o posibleng makahadlok sa mga tawo, nagpakitag diskriminasyon o nagpahilom sa uban.
PAGKAPRIBADO
Dedikado mi sa pagprotektar sa personal nga pagkapribado ug impormasyon. Ang pagkapribado mohatag sa mga tawo og kagawasan nga mahimong tinuod sa ilang kaugalingon, mohatag og kahigayonan nga mopili kon unsaon ug kanus-a mo-share among mga serbisyo, ug makatabang aron mas sayon nga makigkontak.
DIGNIDAD
Nagtuo mi nga parehas rag dignidad ug mga katungod ang tanang tawo. Among gidahom nga tahoron sa mga tawo ang dignidad sa uban ug dili harason o pakamenoson ang uban.
Mga Tamdanan sa Komunidad
Ang among mga Tamdanan sa Komunidad magamit sa tanan, sa tibuok kalibotan, ug sa tanang klase sa content, apil ang AI-generated nga content.
Kada seksiyon sa among mga Tamdanan sa Komunidad magsugod sa usa ka “Katuyoan sa Palisiya” nga nagpakita sa mga tumong sa palisiya nga gisundan sa espesipikong mga linya sa palisiya nga naghan-ay sa:
Content nga dili puwede; ug
Content nga nagkinahanglan og dugang impormasyon o konteksto aron ipatuman, content nga gitugotan nga naay warning screen o content nga gitugotan pero puwede rang tan-awon sa mga 18 anyos pataas.